zazaki.net
23 Oktobre 2017 Dişeme
Girdîya Karakteran : 12 Punto 14 Punto 16 Punto 18 Punto
27 Sibate 2012 Dişeme 15:29

Nuşteyê Edîtorî yê Rojnameyê Newepelî-19

Roşan Lezgîn

Yeno mi vîr, zemanêk miletî zaf cixara şimitêne. Mînîbusan de, otobusan de, her ca, heme cayan de cixara ameyêne şimitene. Otobus û mînîbusan de peyê her qoltuxe de welidane estbî. Qotikanê cixara ra bîyêne pirr, boyêka girane ci ra ameyêne. La nê serranê peyênan şimitişê cixara bineyke kêmîyayo. Qet nêbo milet cayo girewte de, otubus û mînîbusan de êdî nêşimeno. Seba ke cayo girewte de cixara nêro şimitene, qanûn bîle vejîyayo. Ez nêzana çiqas tetbîq beno la cayo girewte de cezayê şimitişê cixara 63 TL pere yo.

Qanûn nêbo zî, sey fehmêk, nika cayo girewte de, mîyanê miletî de cixara bêro şimitene, eyb o. Weş nîyo. Esas çîyo tewr muhîm cezaya qanûnî nîya, fehm o, kultur o. Mi bi xo zî verê cû cixara şimitêne. Mi zaf şimitêne, hema vajîn ke roje de mi di paketî şimitêne. Yew zî qutuya mi estbî. Ge-ge mi tutino qaçax piştêne. La bîy şeş serrî ke mi cixara terk kerda. Ez bin ra cixara ra xelisîyaya. Êdî boya cixara mi rê zaf pîs a. Eke bineyke boya dûyê cixara bêro mi, zerrîya mi qelibêna, sereyê mi dejeno.

Sûka Dîyarbekirî de ge-ge ez wenişena mînîbuse. Mînîbusî ding ra ding muşterîyan wenanê-ronanê. Bî çend rey ke yew hereket bala mi anceno. Ma vajîn, camêrdêk ha ding de hem cixaraya xo şimeno hem zî paweyê mînîbuse yo. Mînîbuse ke ameye ding, cixaraya camêrdî hema nême nêbîya. Camêrd yew linga xo erzeno zereyê ereba yewe teber a. Çend helmî pêsero-pêsero cixara ra şimeno, sêneyê xo keno pir. Û bê ke dûyê zereyê xo verado teber, cixaraya xo vir keno erzeno û wenişeno mînîbuse. Yanî qaşo camêrd merdimanê bînan rê hurmet keno, cayo girewte de, yanî mînîbuse de cixara nêşimeno!

Mînîbuse hereket kena, ber gêrîyeno. Camêrdê ma, o dûyê cixara ke çend helmanê pêtan de anto zereyê xo; pişika xo, heme sêneyê xo pê kerdo pirr, helmêk de heme veradano zereyê mînîbuse. Zereyê mînîbuse reyke de keno pirr boya pîse ya cixara.

Bîy çend rey ez rastê nê hawa merdiman bena. La na reya peyêne raşt a ke zerrîya mi qelibîya. Ez Otogarê Qezayan ra ameyêne Berê Koyî. Vartî pêsero varayêne, muşterîyê ke weniştbî mînîbuse, ez zî tede, kincê hemîne hît bîy. Zereyê mînîbuse de hewayêko nekmeyin estbî ke merdim nêeşkayêne nefes bigêro. Camêrdêk dingê verê camîya Îstasyone de wenişt mînîbuse. Cixara xo eşte teber la dûyo ke pê pişika xo, sêneyê xo kerdbi pirr, heme verada zereyê mînîbuse.

*

M. Alî Konar xortêko delal o. Şarê ma yê Çewlîgî yo. Xortêko zaf biaqil, maqul û biqabîlîyet o. Sînema ra eleqedar o. Ez ey ra zaf hes kena, ez hêvîdar a ke Homa karê ey raşt bîyaro, şansê ey abo.

Çend rojî verê cû mi rê telefon akerd, va, ez ha Berê Koyî yê Dîyarbekirî de, bineyke badê pey ez şina Îstanbul. Mi va, uca vinde ez ha yena. Axir ez şîya. M. Alî tam verê bedenê qedîmî yê Berê Koyî de bi. Bedeno ke binê ey de salona numayîşî esta, buroyê “Tourism Information” esto. Kîşta ey de di mezelê welîyan estê.

Ma hal-xatirê yewbînan persa. Destê M. Alî de di hebî mandalînayî estbîy. Ê meyweroşê verê Bedenî ra erînaybî. Yewe tole kerda ha weno, yewe zî mi rê îkram kerde. Mi mandalînaya xo tole kerde, ez nat û wet ewnîyaya, cayê de qutîya çopî nêasa. Toleyî destê mi de mendî. Dima ez fetelîyaya mi meyweroşê ke serê erebeyî de meywe rotêne ra persa va, “Bira, qutîya to ya çopî çin a?” Seke mi çîyêko zaf tuhaf vato, camêrd ewnîya mi ra û va, “Her teref çop o, keyfê to kamca wazeno birijne uca.” Mi ewnîya dorûver ra, rast a zî her ca pirrî çop bi. Gelo kam nê çopî rijneno?*

_______________

* Newepel, Rojnameyo kulturî yo 15 roje, Hûmare 19,  Dîyarbekir 16-31 kanûne 2011, r. 2

 

Na xebere 1079 rey wanîyaya
No nuşte hema şîrove nêbîyo.