zazaki.net
18 Tebaxe 2017 Îne
Girdîya Karakteran : 12 Punto 14 Punto 16 Punto 18 Punto
25 Sibate 2012 Şeme 15:38

Nuşteyê Edîtorî yê Rojnameyê Newepelî-15

Roşan Lezgîn
Weşanîyayîşê rojnameyê Newepelî reyde hema vajîn ke her hûmare de yew-di kesî newe dest pêkenê nusenê.

Merdim biewnîyo xo ra ver, vernîyê xo bivîno, ufqê xo hîra bigêro helbet zaf baş o. La ge- ge xo ra pey bifetilîyo û biewnîyo rêça xo ra, biewnîyo firêzeyê xo ra, hal û hewalê xo, rewşa ke tede yo, bizano zî zaf baş o.

Ma zî ge-ge derheqê rewşa xo de qisey bikin, hal û hewalê xo bizanin, zerarê xo çin o.

Tarîxê şaran de bi ziwanê xo vetişê rojnameyêk merheleyêka zaf muhîm a. Helbet tarîxê ma de zî vejîyayîşê rojnameyê Newepelî gamêka zaf-zaf muhîm a. Çunke rojname sey kitab û kovaran nîyo. Rojname, eynî sey radyo û televîzyonî xîtabê şêligê şarî keno. Şiwaneyî ra bigîre hetanî bi profesorî her kes, her tebeqeyê şarî, her kategorîya cematî rojname teqîb kenê.

Rojname hetê ziwanî ra, hetê fikrî ra, hetê edebîyat, huner û kulturî ra, hetê milîyetî ra, xulasa her hetan ra wendoxanê xo zanayîş û hîsanê muşterekan de pêresneno. Eynî sey yew mektebêkê tebîî la hende zî heqîqî yo.

Helbet Newepel rojnameyêko sade, basît û hende zî mutewazî yo; wayîrê îdîayanê girdan qet nîyo la pozîsyonê xo ra haydar o. Gama ke ma newe dest pêkerd, tayê hetan ra fikarê ma estbî; ma texmîn kerdêne ke do tayê cayan ra vernîyê ma bêro girewtene. La ma bi şefafîya xo, bi mutewazîyîya xo, bi fikrê xo yê zelalî, bi helwêsta xo ya biryardare û bi konseptê xo yê rastî rayîrê xo rast kerd.

Bîy 15 hûmarî ma vejenê. Eke merdim nê 15 hûmaranê rojnameyê ma bi rojnameyanê miletanê bînan bido têver, tu çîyêk zî nîyo. La eke merdim rewşa ma kirdan baş nas bikero û bala xo bido nê 15 hûmaran ra, do bivîno ke ma çi merheleyêka muhîme xo ra pey verdaya.

Verê verkan, Newepelî şermê kirdan dart we. Şarê ma fedî kerdêne ke bi kirdkî (zazakî, kirmanckî, dimilkî) qisey bikero. Wina barîyerêko psîkolojîk vernîyê însananê ma de estbî. Newepelî no barîyer rijna, şermê qiseykerdişî şikit.

Xora wayîrvejîyayîşê ziwanî, wayîrvejîyayîşê nasnamayê neteweyî, se ra şeştî psîkolojîkî yo. Eke prestîjê ziwanî, prestîjê nasnameyê milî berz bo, maderê îftîxarî bo, şar bi xo wayîr vejîyeno.

Weşanîyayîşê rojnameyê Newepelî reyde roje bi roje nuştoxê kirdkî zêdîyenê. Hema vajîn ke her hûmare de yew-di kesî newe dest pêkenê nusenê. Mesela, nê 15 hûmaran de roportajan ra teber 54 kesan nuşto. Nînan ra tewr tay 30 merdiman reya verêne Newepelî de dest bi nuştiş kerdo. Û çîyo muhîm, qismêko zaf muhîm yê nê kesan nuştiş de dewam kenê û zafê nuştoxanê neweyan ciwan ê; wendekarê lîse yan unîversîte yê. Zafê nê nuştoxan benê kadroyê huner, edebîyat, ziwan û kulturî. Mi gore eke miletêk yan zî grûbêka cematkî wayîrê 100-200 kadroyanê perwerdebîyayan bo, vernîyê xo akerde yo. Kadroyî sey organîzmayanê wucûdî hertim xo zêdnenê; dînamîkê heqîqî yê miletî yê.

Kesê ke hetanî nika 15 hûmaranê Newepelî de nuşto, nê yê:

Ahmed KIRKAN

Ayhan SARIGOL

Bawer XEBAT

Bedrîye TOPAÇ

Berxwedar PÎRANIJ

Bîlal ZÎLAN

Cemal AZIJ

Deniz Dilar PÎREJMANIJ

Dogan KARASU

Duzgun AXDAT

Ehmedê DIRIHÎ

Ehmedê XASÎ

Elîyê QASIMÛN

Emîne GUZEL

Enwer YILMAZ

Erdal DEMIR

Esra ALTUN

Ezîz DERDAN

Hesê BELÊ

Hesenî GIRAN

Huseyîn ÇAKAN

Îsmaîl GUVEN

Mahîr DOGAN

MALMÎSANIJ

Mehmed SEYÎTALÎOGLU

Mehmed YERGÎN

Menaf MUTLU

Meqsed MUQRÎYANÎ

Mistefa GOMAYIJ

Mistefa KARADAGLI

Mistefa ŞAHÎN

Murad BAKUDAN

Murad CANŞAD

Mutlu CAN

Nadîre G. ALDATMAZ

Netîce ALTUN

Newzat ANUK

Newzat VALÊRIJ

Nûrî KELEŞ

Pişar XANÇUKIJ

Remezan YALINKAYA

Rindê BECERÎKLÎ

Rohelat AKTULUM

Roşan LEZGÎN

Sebahedîn Ozan ASLAN

Serdar BEDIRXAN

Seyîdxan KURIJ

Sînan SUTPAK

Umer Farûq ERSOZ

Wehdet SÎWANIJ

Weysel HANYILDIZ

Wisivê MURTÎ (Yusuf GÜVEN)

Xurşîd MÎRZENGÎ

Zerrweş XODÎ

Ganî merdim nameyê Mucahîd BARANî zî zikr bikero ke ey zî bi karîkaturanê xo reng da rojnameyê ma.

Ez peynî de naye vajî. Helbet xeşîmî û kemaneyê ma estê. Ma paweyê rexne, pêşnîyaz û ardimê dostan ê. La xeta ma rast a, konseptê ma rast o. Firêzeyê ma pak o. Nîyetê ma, keda ma, uslubê ma, xîtabetê ma rast o. Dostê ma, hemkarê ma zî sadiq û pak ê. Înşalah Homa zî hetkarê ma yo.*

_______________

* Newepel, Rojnameyo kulturî yo 15 roje, Hûmare 14,  Dîyarbekir 16-31 oktobree 2011, r. 2

Na xebere 1084 rey wanîyaya
No nuşte hema şîrove nêbîyo.