zazaki.net
22 Oktobre 2017 Yewşeme
Girdîya Karakteran : 12 Punto 14 Punto 16 Punto 18 Punto
20 Nîsane 2010 Sêşeme 08:42

Malmîsanijî ra Kitabêko Newe

[Xebere]
Zazakî.NET

Kitabêkê bîn ê ziwannas, cigêrayox û nuştoxê kurdan Malmîsanijî “Yirminci Yüzyılın Başında DİYARBEKiR’DE KÜRT ULUSÇULUĞU (1900-1920) (Destpêkê Seserra Vîstine de Dîyarbekir de Neteweperwerîya Kurdan (1900-1920))” hetê Weşanxaneyê Vateyî ra neşr û vila bi.

Vateyê verên ê kitabî de wina yeno vatiş: “Roja ewroyî de Dîyarbekir şaristanê tewr muhîm ê hereketê neteweyî yê kurdan o. Seba ke merdim hereketê neteweyî yê kurdan hol bişinasno ganî merdim bala xo bido tarîxê ey ê nê şaristanî ser. Sere de nê şaristanî de rewşa nê hereketî senî bîye û senî aver şîye? Gama ke hereketê organîzekerde yê neteweyî yê kurdan dest pêkerd kamcîn hêzî vera (duştê) ey vejîyayî?” Badê ke nê persî persîyenê, wina yeno vatiş: “… Na xebate de apey agêrîyeno heta destpêkê seserra vîyartîye û cewabê nê persan dîyeno.

Malmîsanij destpêkê qismê netîceya kitabî de vano: “Peynîya na xebate de qenaetanê ke mi rê virazîyayî ra yew no yo ke roşnvîrê kurdan ê ke lehçeya kirdkî (zazakî) qisey kenê, bitaybetî merheleya verêne ya neteweperwerîya kurdan de rolêko muhîm kay kerdo.” Peynîya qismê netîce de zî tesbîtêko winasî keno: “… Eke ser nêkewê zî xebatanê ê wextî mintiqa de rêç û kadroyê muhîmî xo ra pey verdayê. Eke roja ewroyî Dîyarbekir hereketê neteweperwerîya kurdan de wayîrê cayêkê muhîmî yo, kokê xo reseno ê xebatan. Heto bîn ra, îdareyê dewlete, serranê badê ê wextî de Dîyarbekir de ca dano dezge û nîzamê xo. Seba ke sîstemê fikr û erjanê kemalîstî bi şarê kurdî yê nê cayan bido qebulkerdiş dest ra çi yeno texsîr nêkeno la winî fehm beno ke hewna zî nêşayo ser kewo.

Hûmara kitabanê neşrbîyayeyan ê Malmîsanijî, bi nê kitabî ra bîye 28. Kitabê ke Weşanxaneyê Vateyî weşanayî zî bi nê kitabî ra resaye 50. 

Adresa waştişî:

Vate Yayınları

Katip Mustafa Çelebi Mahallesi, Tel Sok. No: 18 Kat: 3

Beyoğlu – İstanbul

Tel: 0 212 244 94 14

e-post: wesanxaneyevateyi@hotmail.com

Dîyarbekir de:

Cadeyê Ekincileran, Apartmanê Nurlaran, Qat 3, Ofîse – Dîyarbekir

 

Malmîsanij, Yirminci Yüzyılın Başında DİYARBEKiR’DE KÜRT ULUSÇULUĞU (1900-1920), Weşanxaneyê Vateyî, Îstanbul 2010, 159 rîpelî, ISBN: 978-975-6278-42-0

Na xebere 2804 rey wanîyaya
No nuşte hema şîrove nêbîyo.