zazaki.net
21 Temmuze 2017 Îne
Girdîya Karakteran : 12 Punto 14 Punto 16 Punto 18 Punto
03 Hezîrane 2015 Çarşeme 11:52

LUY, KUTIK Û HER

Luy kuwena her lîyak nêkuwena her lîyak her înad xwu ra ranêvîyaren, hetûnîya g' ti ra yeno veng berz a zirren

Arêkerdox: Îsmet BOR 

Vatoxe: Semah EREN*

Mintiqa: Têrcan

Cêk ben cêk niben, yo luy, yo kutik û yo her bên. Kutik luy û herî ra vûn, bîyerîn ma xwu îr way û biray cê b'. Ez ben biray' şimawo pîl, şima zî bên wak û birak mi. Ez şima vergûn û heşûn ra pawen. Luy û her vûn temom.

Kutik vûn:

- Wayê! Bira! În zerê zaf talûk ê. Bîyerin ma şîn ser yo kûe, ûja d' yo gûel esta, ma şîn ûja xwu nimnen, ne verg rasen ma, ne heş.

Luy û kutik vûn:

- Temom, ma şi.

Hîrê hemi kuwen pê û şîn ser kûe ver gûel. Her rindarind çeren, pîyezê xwu ken mird. Şûnd dîyen, kutik vûn:

- Wake, keko! Ez a şin bacar, ser zibîl ra gêren, pîyezê xwu ken mird û yen. Birak mi xwu ra çerd bîyo mird û wakê xwu îr îz ez tay pawer tê ûn.

Luy û her vûn:

- Temom keko.

Kutik vûn:

- Şima vengê xwu mevej, hetûn ez bîyer. Wa verg û heş şima mehesîy!

Yi vûn:

- Temom bira.

Kutik şin. Her pîyezê yi bîyo mird, qet hîşar serê yi d' çinîk. Her vûn:

- Waka luy, wullay zirrayîş mi ûmo, ez a zirren?

Waka luy vûna:

- Nê nê, keko! Ti mezîr? Bo ti vergî û heş hesînên ma. Ti xwu vîr ra kerd, kekê kutîk va, veng xwu mevejîn hetûn ez bîyer.

Her vûn:

- Wakê, eg zirrayîş mi ûme, ez zirren. Hem ma hê ser inî kûe ya, in berzîye ra, verg û heş senî rasen ma?

Luy kuwena her lîyak nêkuwena her lîyak her înad xwu ra ranêvîyaren, hetûnîya g' ti ra yeno veng berz a zirren.

Ûhû veng şin veîrg. Verg yen vûn:

- Hero bira, ti çend weş zirren. De binêk bîye nata?

Her vûn:

- Nîye! Ez nên, ez bîyer ti mi wen!

Verg vûn:

- Hero bira mî îr veng ti zaf weş. Ez vûn, ti bineyna nata bîyer û mî îr yone lawik vaj.

Her vûn:

- Ti sûez dûn, ti qarişê mi nêben? O wext ez yen.

Verg vûn:

- Hero bira! Ez sûez dûn, ez bê hakûn ti, dest xwu ti wa nêdûn.

Her şin nizdîye verg, verg zît ben hakûn herî ya kuwen, her erzen erd. Bena zirr-zirrê herî. Her vûn:

- Vergo bira! La ti sûez da mi, ti va ez ti nêwen?

Verg vûn:

- E, mi ti ra nêva, ez bê hakûn ti, dest xwu ti wa nêdûn! Ez sûez xwu d' vinderta.

Verg hêr wen pîyezê xwu ken mird û şin.

Zaf tay wext bênati ra vîyaran ra, kutik cêk ra vejîyen yen. Kutik ûnîyen ci her oja d' nîyo. Waka luy ra pers ken vûn:

- Wakê! Biray' ma her ho kûmca?

Waka luy vûna:

- Keko, zirrayiş yi ûme, ez kowta lîyak nêkowta lîyak, wu zirra, verg ûmî wû xapit werd.

Kutik vûn:

- Wakê, ma herkûnîye herî vera nêkowt û ez û ti ma gûnî mend ina zî bes a.

___________

*Semah Eren 25.06.1974 de  qezaya Erzinganî Têrcan de dewa Kotire (Kötür) de ameya dinya. Hema yewserre bîya pîyê aye keyeyê înan bar kerdo berdo Îstanbul. Şîyêsserre bîya ameya Almanya. Almanya de zewejîyaya û wayîrê hîre qijan a. A qijanê xwu zî bi kulturê xwu kena pîl. Herçiqas keyeyê înan asîmîle bîyo û kurdperwerîye ra kewto dûrî zî, aye ne welatê xwu ne zî kulturê xo, xwu vîr ra kerdo. Hertim vengê pîrika aye ya Xanime goşê aye de bîyo. Na sanike zî pîrika aye Xanime aye rê vata.

Na xebere 2390 rey wanîyaya
No nuşte hema şîrove nêbîyo.