Hûmara 2. ya ŞEWÇILA Vejîya

Hûmara diyine ya kovara edebî-hunerî ŞEWÇILA ke safî bi kirdkî weşanîyena, bi eseranê neweyan ke ro edebîyatê ma yê modernî zêdnayê, vejîya.

Na hûmare de xususîyeto tewr muhîm no yo ke eserê hîrê cinîyan tede ca girewto. Bedrîye TOPAÇ bi nuşteyê xo “Cinî” û şîîra xo “Seba To”, Xurbet ORÇEN bi şîîra xo “Hesrê Çimanê Mi” û Neşe BABIJ bi nuşteyê xo “Qeçekîya Mi Boya Rihanî Bî” hûmara diyine ya ŞEWÇILA de ca girewto.

Cinîyan ra teber zî gelek xortan newe dest bi nuştiş kerdo. Osman TETÎK bi şîîra xo “Dejê Ceylane”, Ferat KAYA bi şîîra xo “Dejê Barî”, Weysel HANYILDIZ bi şîîra xo “Zerra Betilîyaya” reya verêne kovara ŞEWÇILA de ca gênê.

Hewna Bîlal ZÎLAN bi şîîra xo “Kam o Ez?”, Alî Aydin Çîçek bi şîîra xo “Asmên” û bi hîkayeya xo “Çila”, Newzat DODANIJ bi şîîra xo “Şewe û Xirabîye” û bi analîzê xo “Hîkayanê Roşan Lezgînî de Teswîrî”, Îsmaîl GUVEN bi hîkayeya xo “Saya Sûra Girde”, Huseyîn Karakaş bi hîkayeya xo “Vaye” û bi nuşteyê xo “Soro û Romannuştoxîya Deniz Gunduzî”, Mehmed YERGÎN bi analîzê xo “Mela Mehmed Elîyê Hunî û Mewlidê Ey”, Murad CANŞAD bi nuşteyanê xo “Xem” û “Marwer”, Roşan LEZGÎN bi analîzê xo “Edebîyatê Modern yê Kirmanckî (Zazakî)” û hîkayeya xo “Nêweşîya Dîyarbekirî”, Xurşîd MÎRZENGÎ bi hîkayeya xo “Şindokê Mêrdeyan”, Mehmed Elî SADIQ bi şîîra xo “Bê to” û Xerîbzeman bi şîîra xo “Adirê Eşqî Taca Sereyî ya” na hûmare de ca gênê.

Nînan ra teber, çend eserê ke ziwananê xerîban ra seba kirdkî ameyê açarnayene zî na hûmare de ca girewto. Hîkayeya hîkayenuştoxê namdarî yê farisan Sadiq HÎDAYETî “Kutiko Veradaye” fariskî ra, hîkayeya hîkayenuştoxê galîzyayijî Séchu SENDE “Hewnan de zî Ez do Ziwanê Xo Vîndî Nêkerî” û şîîra Cahîd Sidqî TARANCI “Ez Welat Wazena” tirkî ra seba kirdkî ameyê açarnayene.

Edîtor û amadekarê kovare Roşan LEZGÎN nuşteyê destpêkî yê kovare de dano zanayene ke na hûmara kovare bi ardimê madî yê di heskerdoxanê kirdkî ameya çap kerdene û tîya ra pey zî bitaybetî bi ardimê yew heskerdoxî do hîna gelek hûmarî bêrîn çap kerdene.

Roşan LEZGÎN peynîya nuşteyê xo de veng ro wendoxan keno ke seba yewna hûmare şîîr, hîkaye, xeber, krîtîk û nuşteyanê xo yê edebî-hunerî-estetîkan kovare rê bişirawîn.

Kovarî seba averşîyayîşê edebîyat, huner û bitaybetî ziwanê miletêk zaf muhîm ê; kovarî sey wendegehan ê. Zafê kadroyê miletêk; nuştox, şaîr, edîb, rexnegîr, hunermend, ziwanzan û akademîsyenî çarçewaya xebata kovaran de vejênê meydan, aver şinê. Û xora miletêk bi sayeyê kadroyanê xo yê winasîyan bena netewe. Hûmara diyine ya kovara ŞEWÇILA zî naye nîşan dana.

Badê kovara kulturî ya safî bir kirdkî Vateyî, kovara edebî-hunerî ŞEWÇILA averşîyayîşê edebîyat û hunerê kirdkî de cayê xo pêt gêna.