zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
07 Tebaxe 2009 Îne 08:42

Hîkayeyê Huseyîn Karakaşî: Omid Esto

[Daşinasnayîş] Deniz Gunduz
Huseyîn Karakaş: Omid Esto

Hîkayeyê Huseyîn Karakaşî: Omid Esto

Deniz Gunduz

Hîkayeyê Huseyîn Karakaşî yê ke hepis de ameybî nuştene û kovara Vateyî de neşir bîbî, se kitab çap bîyê. Kitab de şeş hîkayeyî estê û nê hîkayan de Huseyîn Karakaş zîyadetir behsê cuya dewijan keno. Bi ziwanêko weş behsê têkîlîyan û derdanê înan keno. 

Huseyîn Karakaş hîkayenuştiş de gelek ciraamaye yo. Tenê bi kirmanckî ney, bi tirkî zî ey zaf hîkayeyê başî nuştê. Aye ra serkewte yo. Ey  “Musabeqeya Desine ya Hîkaye û Şîîran ê Huseyîn Çelebî” de seba yew hîkaya xo xelata dîyine girewta.

Cuyê Huseyînî gelek balkêş o. Hîna çarês serrî bîyo ke dewa xo ra vejîyayo şîyo Îstanbul. Îstanbul de karanê cîya-cîyayan de sey karker xebetîyo û hetê ra kî mîyanê xoverdayîşê sendîkayan de cayê xo girewto. Çepgîrîya tirkan ra dima mîyanê xoverdayîşê şarê xo de cayê xo girewto. Dima ra kewto hepis û cezaya îdamî girewta.

Ey mektebanê tirkan de tena mektebo verên wendo. Labelê ey hetê ra wendo, hetê ra zî nuşto. Hîkayê ey zî sey cuya ey ê. Hîkayanê xo de behsê emegdaran keno. Behsê dinyaya înan a ke xeriba nê dewrî ya keno. Û behsê yew merdimê peyê kilîtan keno. O merdimo ke nêşîyeno (bese nêkeno) omidê (hêvîya) xo name kero, webalê omidê xo ra terseno. Wazeno ke omidê ey bi xo rayîrê xo vejo.

Nameyê hîkayanê Huseyîn Karakaşî ke no kitab de ca girewto nê yê: “Xewf”, “Wayîrê Hênîyê Mamedî”, “Xopan”, “Serê Tumê Pîlî ra”, “Omid Esto” û “Tirankî”. 

 

 

Huseyîn Karakaş Kam o?

Serra 1968 de, qezayayanê Sêwasî ra Kangal de, “Dewa Derî” de maya xo ra bîyo. Hetanî çarês serrîya xo dewe de mendo. Mekteb qedênayo, peyê cû ameyo Îstanbul û karanê cîya-cîyayan de se karker gurîyayo. Wexto ke karkerîye kerda kewto mîyanê faalîyetê sendîkayan zî. Ey, hetê ra karkerîye kerda hetê ra zî xo bi xo wendo. Çi edebîyatê tirkan ra çi edebîyatê dinya ra bo zaf nimûneyî wendê. Tena eserê edebî ney, zaf eserê sîyasî zî wendê.

Hetanî serra 1991î mîyanê faalîyet û xoverrodayîşê karkeran de bîyo. 1991î ra pey kewto mîyanê têkoşînê xelisîyayîşê şarê Kurdîstanî. 1996 de Îstanbul de ameyo tepîştene û kewto hepisxane. Derheqê ey de seba dayîşê cezaya îdamî dawa ameya akerdene û na dawa hetanî serra 2006î dewam kerdo. Peynî de dewaya ey cezaya idamî ra çerixnaya cezaya muebbedî. Nika "Kocaeli 2 Nolu F Tipi Kapalı Cezaevi" de hepsî yo.

Huseyînî serra 1996î de dest bi nuştişî kerdo. Hetanî ewro kovaranê se Ütopya, Yurtsever Gençlik û rojnameyê Özgür Gündemî de nuşteyê ey bi tirkî, kovara Vateyî de zî hîkayeyê ey bi kurdkî (kirmanckî) vejîyayê. Hîkayeyê ke nê kitabî de yê, kovara Vateyî de vejîyayê.

Huseyîn bi tirkî zî hîkayeyan nuseno. Serra 2002yî de "Musabeqaya Hîkaye û Şîîranê Tirkî ya Desine ya Hüseyin Çelebi" de seba hîkayeya xo xelata dîyine girewta.

 

 

Eser: Omid Esto

Nuştox: Huseyîn Karakaş

Tewir: Hîkaye

Rîpel: 65

Weşanxane: Weşanxaneyê Vateyî, Îstanbul, 2006

 

293

 

Adresa Waştişî: Vate Yayınevi Katip Mustafa Çelebi Mah. Tel Sok. No: 18 Kat: 3 Beyoğlu / İstanbul
Tel: 0 212 244 94 14, E-post: kovaravate@yahoo.com

Seba Dîyarbekirî Adresa Waştişî: Vate Dergisi Diyarbakır Bürosu  Lise 2. Sokak Adalet Apt. Kat:1 No:3 Yenişehir / Diyarbakır
Tel: 0 412 223 03 69

Na xebere 7785 rey wanîyaya
No nuşte hema şîrove nêbîyo.