Çend Çibenokî

1- Bawkalê min o erîşin, ha binê erdî de.

2- Bawkalê min o kufikin, ha binê erdî de.

3- Cêr ra yenû, rêx erzenû.

4- Çuway min a çowt, pey howt koyûn di kowt.

5- Dapîra mi esta, loqlanê xo xo dima kaş kena.

6- Dar a, zinar a, çemçîliko kinar a.

7- Dara min a vame, des û di game, her gama xo jû tame.

8- Dare lerzena, vore erzena.

9- Des birayî, pê di polû hewanayî.

10- Dês rijîya, xencer vejîya.

11- Di heb sayî, ha rîy ma ra yî.

12- Di qulikî ver berî de, şew girewte, roj akerde.

13- Dîko qol, dekewto gol, gol peysa, dîk nêasa.

14- Esto-mesto, to ra besto.

15- Ez bera ber ra şîyo zere, yew say mi çewres tenon rê barî kerdî.

16- Ez payîz vecîno wextê rezo, akinê mi veynê çi weş rêz o.

17- Ez şina a zî şina, ez vindena a zî vindena.

18- Ez şina a zî şina, nuxta nuxta rêç kena.

19- Fistono kesk, mîyon di estê bisk.

20- Gawo kej o, aw ra dej o.

21- Gawo sur, bi hewt cilî.

22- Gayêde mi esto, sere birnen, ser o bermen.

23- Gayo sur, gilê dar ra.

24- Gêwa bawkî, pirrê dewarî ya, serê sibayî urzenê, tek tede çinî ya.

25- Goşbel, goştwer.

26- Hero bêcil, daro bêvil.

27- Hûr-hûrikî, di qulikî.

28- Kutiko sîya ber paweno.

29- Letey nûnî, pey bûnî.

30- Oynî ya yî, tewir hawa yî.

31- Qutîya kesmey, ha pirr estey.

32- Rep-repik, şep-şepik, ser erdî de, qurmiçik.

33- Serê bûnî, pirrê nehey.

34- Serê gilî di adir veşeno.

35- Şew bi yeno, nimacî şono.

36- Şono rêçe çinî ya, yeno toz çinî yo.

37- Tasa cûmî, ha pirr vûmî.

38- Tasa min a zerde, darûberî ser de.

39- Teliyê darê mi girr ê sey dice, gedey mi dekenê tonek, vazdonê kuçe.

40- Tîya ra rezû, xir-xirey gozû.

41- Yew çîy mi esto, yew çimê yay o.

42- Yew çîyê mi esto, cuwal de ca nêgêno, bazar de nêroşîno, zaf çîyêde şîrîn o.

43- Yew çîyê mi esto, didanê xo estê, fekê xo çinî yo.

44- Yew çîyê mi esto, hende weno, mird nêbeno.

45- Yew çîyê mi esto, hetê ra weno, hetê ra keno.

46- Yew çîyê mi esto, rêzilrêzil heta towrey simerî.

47- Zengê zardî bî, daron di leqaybî.

48- Zenge-zinge, tede kenê tinge-tinge.

49- Zereyê xo sipî û zer o, dormê xo kemer û kerr o.

50- Zereyê xo tol o, teverê xo pol o, paşkilo weno, husk û hol o.

________

Cewabî:

1- pîyaz, 2- zerrn, 3- huye, 4- rayîr, 5- derzîne, 6-goşare, 7- serre û aşmî, 8- pirozine, 9- gîşt, engişte, 10- kuze, 11- alişke, 12- çimî, 13-qirîncle, 14- name, 15- silom, 16- hinar, 17-sîye, 18-gampole, 19-hindî, 20-meşki, 21-pîyaz, 22-pîyaz, 23-vilikê hinarî, 24-estareyî, 25-verg, cinawir, 26-încîrêr, 27-lox, 28-keseki, 29-aşme, 30-luwî 31- tawute, mezel, 32- silê gayî, 33- estareyî, 34- vilikey hinarî, 35- hewn, 36- mase, 37- asmên û estareyî, 38- tîj, 39- simze, 40- gurrayîşê hewrî, 41- derzîne, 42- hewn, 43- şane, 44- adir, 45- arê, 46- mijlowr, morcela, 47- mirv, murîye, 48- veyve, 49- hak, 50- top

Not: Nê çibenokî mintiqaya Pîranî de vajîyenê û "Newepel, Rojnameyo kulturî yo 15 roje, Hûmare 33, Dîyarbekir 16-31 temmuze 2012, r. 7 / Hûmare 34, Dîyarbekir 01-15 tebaxe 2012, r. 5" de weşanîyayo.