Terefdarîya Ma Kurdan

Verê cû Diyarbekir de nêweşîya tîfoyî zaf estbî. Zaf însanê ma ena nêweşî ra telef bî. Payizê 1991 de ez zî bi ena nêweşî kewta, ez şiya halê mergî la Homayî temam nêkerd. Dima ez tedawî biya û hêdî-hêdî ameya xwu. Labelê ena nêweşîya bêîmane bitaybetî mewsimê wesarî û payizî çend serrê bînî zî mi de nukis kerd, ez perîşan kerda. La şukir Homayî rê, badê pey ez ci ra feletîyaya.

Tam wexto ke ez nêweşî ra bêhal kewtbiya, vatêne Amerîka do bido Îraqî ro. Sedam zî, seke Helebce de kerdbi, do kîmyasal bierzo.

Badê şerrê Îran-Îraqî (1980-1988) Îraqî 1990 de dabi Kuweytî ro û qismen dagîr kerdbi. Enê ser o Amerîka 36 dewletê bînî zî antbî xwu het û amadekarî kerdêne ke vera Îraqî de şer îlan bikero. Axirî, roja 17 kanûno peyîn 1991 de Amerîka da Îraqî ro û Şerê Kendawî dest pê kerd.

Verî ke Amerîka bido Îraqî ro, hema vajêne ke nîmeyê Diyarbekirî bi veng. Şarî vatêne do Sedam kîmyasal bierzo Diyarbekir, coka zafê kesan keyeyê xwu waro verdabi şibî dewan. Êyê ke mendbî zî, naylon yan zî cacimî antêne pencerayanê xwu û bi kolîband mehkem band kerdêne. Enê ser o nameyê kolîbandî bibi "bandê Sedamî." Hema zî ez vînena zaf cayan de kolîband ra vanê "bandê Sedamî."

Diyarbekir de keyeyê ke bêwayir mendbî seba dizdan bibî xenîmet! O wext hende keyeyî ameyî şelênayiş ke qet mevajê. Dizdan roj orteyê roje de qamyone antêne keyeyî ver, seke keyeyê xwu bihewelnê, heme eşyayê keyeyî bar kerdêne berdêne.

Tam ê wextan, di xortan yew mesela ser o dabi pêro, yewî kardî daybî êyê bînî ro. Mi her di hetî zî şinasnayne. Coka ez zî bi ê halê xwu yê nêweşî kewta miyanê înan ke mesela derg nêbo, xwu rê werê bêrê. Çend kesê bînî zî sey mi biyî mabeynkar. Axirî, ma her di hetî îqna kerdî, ma ê werê ardî.

Merasimê werêameyişî de ma davîst camêrdî keyeyê xortê ke kardî ginaya piro de ameyî pêser. Ma mesela hel kerde û bi keyfweşî şîranî wenê, şerbetê xwu şimenê, dima çay û cixara, teraqe biye weş…

O wext rojevê Tirkîye derheqê Şerê Kendawî de bi. Radyo, televîzyon û rojnameyan de ser û binê xeberan Îraq û Amerîka bî. Esas hîna zaf behsê Sedam Huseynî û George W Bushî biyêne. Helbet Diyarbekir de zî minaqeşeyo sereke Sedam û Bush bî. Keyeyan de, qehwexaneyan de, dikanan de, esnafan miyan de, mînîbus û otobusan de qijan ra bigêrê bi pîlan, cînîyan ra bigêrê bi camêrdan, her kesî derheqê Îraqî û Amerîka de qisey kerdêne. Tayê bibî terefdarê Sedamî tayê zî bibî terefdarê Bushî û minaqeşeyê zaf sertî vejîyayne.

Argumanê terefdaranê Sedamî eno bi ke Sedam misliman o, Bush zî gawir o. Kesê mislimanî zî gereka terefdarê mislimanan bê. Nînan gore kam terefdarê Amerîka bo, yanî terefdarê Bushî (înan vatêne Corc Puşt) bo, dîn ra vejyeno û beno ehlê kufrî, beno terefdarê gawiran.

Terefdaranê Amerîka ke waştêne Bush bido Sedamî ro, vatêne, Sedam neyarê kurdan o, ey kîmyasal eşto Helebce, ey kurdî qetil kerdê, wa Bush pirodo heyfê kurdan ci ra bigêrîyo.

Keyeyo ke ma hende merdimî seba yew karê mibarekî, seba werêardişê di hetan tede ameybî pêser de, badê merasimê werêameyişî, suhbetê ma zî tadîya minaqeşeyê derheqê şerê mabeynê Amerîka û Îraqî de.

Eynî seke teber de beno, oda de zî qismêk terefdarê Sedamî, qismêk terefdarê Bushî bî. La tayê zî bêteref bî, fikrê înan çinê bi.

Mabeynê her di hetan de minaqeşe tadîya xirecirî ser û her ke şi tansîyon bi berz. Oda de hema vajêne ke tewr ciwan ez a. Ez fedî kena ke midaxeleyê înan bikerî, vateyê înan bibirnî. La esas, ez nêweş a, qet halê mi çinê yo ke ez qisey bikerî.

Demeyêk tansîyon hende bi berz, mi hew dî yewî va "Ez çimê Bushî biwerî, wa pirodo, wa di dadîya Sedamî …!"

Wulay êyê bînî zî xwu ci rê nêna ro, qîra ser, va "Ez û Sedam piya ma bikerê di dadîya to û Bushî ra!"

Û terp û rep da yewbînî ro. Qutîyê cixaran û çeqmaqî hewa ra perayî. Kulpî û repî, hewar û qîrî kewte oda ser.

Ez bi ê halê xwu yê nêweşê perîşanî mîyanê lingan de menda, ez perîşantir biya…