“Ez hema deyndarê welatê xwu ya”

“Ez hema deyndarê welatê xwu ya”
Welat Ramînazad

Reya verîne bi wasitaya rojnameyê Newepelî mi nameyê Ehmedê Dirîhî şinawit. Rîpelê peyîn yê Newepelî de fotografê nebatêk estbî, bin de zî nameyê nebatî goreyê mintîqeyanê Kirdî û bi Kirdasî, Soranî, Tirkî û Latînî estbî. Arêkerdişê nameyê gulan, vilikan, vaşan û daran hem zaf weşê mi şibi hem zî keyfê mi ardibi. Dima her hûmara Newepelî de bitaybetî mi ena xebate tehqîb kerdêne. O wext mi va qey sey hobî ho xwu rê nameyê nebatan arê keno la dima Ferhengê Navên Nebatan ke vejîya, mi fam kerd ke xebatêka hobîyane nîya, xebatêka sîstematîk a.

Giringîya xebata arêkerdişê nameyê nebatanê Kurdî babeta yewna nuşteyî ya. La ancî zî ez wazena derheqê giringîya xebata arêkerdişê nameyê nebatan de çend çiyan vajî. Arêkerdişê nameyê nebatan, tenya nameyê nebatanê Kurdî vînbiyayiş ra nêxelesna, vîrê ma zî korbiyayiş ra feletna. Mekanê ziwanê Kurdî dewî û tebîet o. Eke nameyê nebatanê Kurdî bibiyêne vindî, mekanê ziwanê ma zaf teng biyêne, ziwanê ma biyêne sey hêgayê bejî. Sînorê mekanê ziwanêk çiqas hera bo, sînorê vîr û fikiriyayişê qiseykerdoxanê ê zî hende hîra yo. Coka eke nameyê nebatan bibiyêne vindî ma hîna zaf biyêne bê vîr.

Çileyê 2016î de bi minasebetê vejîyayişê hûmara 100. ya kovara Deng bi sernameyê "Ji Raborî Heta Paşerojê Çapemenîya Kurd" panelêk amebi organîzekerdiş. Moderatorê panelî Umît Tektaş bi. Roşan Lezgîn, Sîdar Basut, Ako Mihemed, Silêman Çevîk û Fehîm Işık zî panelîstî bî. Cayê panelî Huzurevlerî de salona otelêk bî.

Panel ra ver mi qet mamosta Ehmedê Dirihî nêdîbi la seba ke çend rey medya de mi fotografê ey dîbi, mi o nas kerdêne. Dades deqayî mendbi ke panel dest pê bikero, beşdaran êdî salone kerdêne pirr. Ez zî rêza vernî de cayêk de ronişta. Ez ewnîyaya mamosta Ehmedê Dirihî zî ho yeno. Ame kişta mi de ronişt. Bi silamdayiş mi xwu da şinasnayiş. Mi verê cû seba xebata ey, ey rê sipasî kerde. Mi derbarê giringîya xebata ey de fikrê xwu va. Mi va “Eke ti nêbiyêne welatê ma de nameyê zaf vilan, gulan, vaşan bibî vindî şibî, to xebatêka zaf erjaya, bêhempa û pîroze kerda.” Qiseykerdişê mi ra dima ewnîya çimanê mi ra û ena cumle va: Ez hema deyndarê welatê xwu ya...

Ey zaf hêdî-hêdî qisey kerdêne, xwura çend cumleyan ra dima panelî dest pê kerd. La hende weş qisey kerdêne, her çekuya ey tehmêk dayne mi. Nika qiseykerdişê ey ra tenya a cumle vîrê mi de menda û do bimano zî. Wexto ke Ehmedê Dirihî vajîyeno, ena cumle yena mi vîr.

Mi o panel de camêrdêko aşiqê vaşan, vilikan û gulanê welatê xwu, camêrdêko dilziwan, dilwelat û niştîmanperwer, camêrdêk ke emrê xwu nayo welatê xwu ser la hema zî xwu vera welatê xwu de deyndar hesebneno nas kerd.

Mamosta Ehmedê Dirihî roja 13.05.2019 de dinyaya xwu bedelna. Cayê ey cenet bo. Homa sebir û deyax bido merdiman û hesekerdoxanê ey.

Mamosta Ehmedê Dirihî!

Ti tirba xwu de rehet rakewe, to deynê xwu dayo, qurişêk deynê to nêmendo. Edebîyatê kurdkî, nuştox û şaîrê kurdan deyndarê to yê. Nameyê nebatanê ke to arêdayê, ganî edebîyatê kurdkî nameyê nabetan vîrê kurdan de newe ra zergûn bikero.

Gelo edebîyatê kurdkî bişo deynê mamosta Ehmedê Dirihî bido?

Bu haber toplam 3788 defa okunmuştur
HABERE YORUM KAT
UYARI: Küfür, hakaret, rencide edici cümleler veya imalar, inançlara saldırı içeren, imla kuralları ile yazılmamış,
Türkçe karakter kullanılmayan ve büyük harflerle yazılmış yorumlar onaylanmamaktadır.
1 Yorum