Miqateyê Madeyê Xo Bibe

Pisporê tenduristîye vanê, verî ke merdim çîyê biwero ganî ser o bifikirîyo ke fayde yan zerarê xo esto. Çîyê ke merdim weno, mîqdarê înan, kalorîyê înanê rojaneyî, germ û serdîya înan zaf muhîm a. Merdim çiqas werdê xo dîqet bikero zî problemê ke vêjênê vernîya merdimî stresî kêmî nêkenê. Labelê barê stresî, heme made anceno.

Eke merdim demeyêko derg vêşan bimano asîtê madeyî zerar dano betaneyê madeyî. Eke merdim badê vêşanîye zêde ra werd biwero, na rey zî barê madeyî giran beno, made nêşêno werdê zêdeyî bihemêno. Merdim lezûbez werd biwero, made de xaz virazîyêno û madeyê merdimî nepixîyêno. Coka eke merdim werd hêdî biwero û hol bicawo, karê madeyê asan beno, werd madeyî narehet nêkeno.

Germî û serdîya werdî zî zaf muhîm a. Werdo zêde germ zî zêde serd zî madeyî rê baş nîyo, zerar dano betaneyê zereyê madeyî. No semed ra ganî merdim werd û çîyê şimitene şîrgerm biwero.

Eke merdim werd biwero û qeldîyo, yanî xo derg bikero, awa madeyî acor kewna ziqlulika werdî, coka qirika merdimî veşena.

Merdimanê qelewan de problemê madeyî hîna vêşî yê. No semed ra merdim zêde kîlo nêgêro madeyê merdimî rê zî baş o.

Çîyê ke rûn de sûr benê û werdê rûninî madeyî rê baş nîyê. Zebze û meyweyanê xagan û cisnê beqlayan de seba ke posa zêde ya, coka kesê ke madeyê xo ra nêweş ê ganî nê çîyan bidîqet biwerê, nê merdimî ganî zebzeyan bipewcê, meyweyan zî bipacê, hîna biwerê.

Çîyê şimitene ke asît tede esto û awa meyweyan madeyê merdimî veşnena. Kafeîn zî seba ke veşnayîş, tirşbîyayîş û dejê madeyî zêdneno, coka made narehet beno. Ganî merdim qewe, çay, çîkolata û sosan zêde nêwero.