zazaki.net
24 Tebaxe 2017 Panşeme
Girdîya Karakteran : 12 Punto 14 Punto 16 Punto 18 Punto
21 Teşrîne 2012 Çarşeme 08:57

Zewtê To

Bedrîye Topaç

  

Mi dî, înan rayîrê mergî akerd û eşq kişt.

Mi dî, boranan dejê eşqî ra sîya da xo ra.

Mi dî, înan sêneyê mi ra zerrîya mi vete.

Û mi zewtê to şirawitî erd û asmênî rê.

***

Mi waşetêne ke ez her şewdir sey tîje çimanê ey de hêdî-hêdî berz bibî. Û bi peşmerîyayîşê ey bêvengîya nê şaristanan biçarnî qîrayîşan ser. Na bêvengîya ke înan daya umrê ma ro… Mi waştêne ke ez bi huyayîşê ey roştîye berî daristananê bêtîjan rê. Nêbî!.. O şî, tijî mi ra heredîyaye.

Dayê, emşo wexto ke aşme asmên de bîye berz, yaxeyê xo pê bicê û seba mi zewtanê xo yê tewr rindan sey yew kile bierze zerrîya koyanê berzan. Wa adir piro gino, koyî kerra bi kerra adir de biveşê. Wa tamê dejê min ê girdî nas bikerê, bi ey bilerzê. Wa emşo adirê mi de ê kî biçerexîyê. Yan kî koyî cayê xo de bimanê ti mi rê çemê Muzirî ra yew kefe awa zelalê biruşne. Yew dilopa bo kî çîyê nêbeno. Wa tena dejê qersunan ra dûrî boya vewra koyanê Markasorî pa bêro.

Mi waştêne ke ez her nêmeye şewan de çimanê ey ra cuye bişimî. Mi waştêne ke seba ey çolan de vilan zergun bikerî. Nêbî!... O şî, vilan boya xo vîndî kerde.

Dayê, emşo estareyan ke rêça xo eşte pelanê daran, ti kî çimanê xo ra hesiranê mi birişne sêneyê royan. Wa royî deryayanê mi de binalê. Wa awa xo de xerîbîye bivînê. Hesrete çik a nas bikerê. Yan kî ti meberme, mi rê bi perperikanê Koyê Zele yew sewda biruşne. Umrê xo hendayê umrê înan kilm bo kî çîyê nêbeno. Wa tena na dinyaya zûrekere de hendayê înan rastikên bo.

Mi waştêne ke ez estareyê tewr rindekî seba ey virarîya asmênî ra bicêrî û ey rê dîyarî bikerî. Mi waştêne ke gonîya ke damaranê ey de gêrena û şona zerrîya ey, ez kî mîyanê aye de yew dilapa bîbîyêne. Nêbî!... O şî, ez ginaya adir ro. Ez bêdû veşena.

Dayê, şewe ke kewte cilanê tarîyan, ti seba mi veng bide pepuganê new koyan û înan rê bi vengê vewre şuwarê mi vaje. Wa reyna dejê way û birayîyê zereyê înan de zergun bo. Wa mi ra, pepuga bêkoye ra bişermayê. Qîrayîş çik o, bihesnê. Yan kî ti pepugan ra dûrî vinde, mi rê kaşanê Dêrsimî ra yew vile biruşne bes a. Yew xeyale bo kî çîyê nêbeno. Wa tena tersê seydwanan ra dûrî boya fekê xezelan biresno mi.

Meverde dayê!

Meverde çimanê mi ra êdî hesirî biherekîyê.

Meverde eşq zî mi caverdo.

Meverde na bêmurada to mîyanê hende dejan de yew kî dejê sewda ra bijîvo.

Ez bi eşqê boranan kewta binê barê na sewdaya xeyalîye. Ez ginaya rayîrê herbê cuye ro. Zerrîya mi xo de vewrêsan kirişnena. Vengê mi nêmendo dayê. Bê, ti nê dejê mi rê veng be. Wa vengê to yo dejin nê erdê sîyayî ser de vila bibo. Wa vengê to çekdarê mi bo. Wa zewtê to tefûduman vejê zerrîyanê waştîyan de. Eşq mîyanê destanê mi ra xiz beno, şono. Cuye bêeşq herekîna. Se beno! Destanê xo derg bike, seba na bêmirada xo eşqî pê bicê, bivindarne.*

___________

* No nuşte “Newepel, Rojnameyo kulturî yo 15 roje, Hûmare 34, Dîyarbekir, 01-15 tebaxe 2012, r. 6” de weşanîyayo.

Na xebere 1567 rey wanîyaya
No nuşte hema şîrove nêbîyo.