zazaki.net
16 Oktobre 2021 Şeme
Girdîya Karakteran : 12 Punto 14 Punto 16 Punto 18 Punto
26 Êlule 2021 Yewşeme 07:24

Yê Ma zî Ziwan o

Evdî Hesqera

Mall of Tokyo de; ina xana moderne, ino cayê girotiş û roştişî de tenya mescîdêk esto. Seba destmacî kaleka ci de hîrê tenî kursî û muslixî estê ke ino dewro maskeyê ci Îslamî, zerrîya ci sekuler de kontenjanê misilmananê nimackerdoxan îsbat kenê. Ê zî çilayanê kapîtalîzmî ra panc deqayî destûr gênê, yenê tiya de nimaco fast-food kenê û şinê...

Ez verê keyberî de biya. Mi pawitêne ke cayê destmacî veng bibo ez dekewî zere. Yew-di kesan nimacê xwu qediêna û vecîyayî, bi sempatîya terafdaranê eynî taximê fûtbolî ewnîyayî mi ra. Mi zî bi automatic pilot, goreyê înan bi "Japonîyêka xirabe" la goreyê xwu bi "eke şima nêverdenê ez bi ziwanê xwu qisey bikerî, ez zî do bi ziwanê şima zey yê xwu qisey bikerî" vat "Homa qebûl bikero". Dima mi vat "qey çî ez bi Kurdî nêvana!" E wulay, ma mescîd de yê, xwura sekulerîzmî ma eştî ino quncik û ganî seba ci zî miyanê ma de empatî-sempatî bibo... Eke yew biperso vaco "ino kamcîn ziwan o?" ez do vacî "Kurdî ya". Dima beno ke winî dewam bikero:

 

Îhtîmalo verîn:

- To bi kamcîn ziwanî vat?

- Bi Kurdî.

- Ma ti bi Japonî nêzanê?!

- Nê, ez Sûrîyeyij a.

- Ê temam, Homa yê to zî qebûl bikero.

 

Îhtimalo diyin:

- To bi kamcîn ziwanî vat?

- Bi Kurdî.

- Ma ti bi Japonî nêzanê?!

- Ma Homa bi Kurdî nêzano?!

- To mi rê vat! Gama ti mi rê vanê bi ziwanê mi vace! Mall of Tokyo de ziwano resmî Japonî yo! Gama ti ameyî tiya, ganî ti bi ziwanê tiyayî qisey bikerê!...

 

Heta ke ez resaya keye ina mesela sereyê mi de şiye û ameye. Wexto ke mi erebaya xwu vindarna, mi ferq kerd ke qican camê peynî ser o bi Japonî nûşto: "Mi bişuwe!" Mi zî bi engişta eşhedî gemarê camî ser o nûşt: MA ZÎ ESTÊ.

Na xebere 149 rey wanîyaya
No nuşte hema şîrove nêbîyo.