zazaki.net
18 Tebaxe 2017 Îne
Girdîya Karakteran : 12 Punto 14 Punto 16 Punto 18 Punto
08 Hezîrane 2012 Îne 10:39

Xeyr-Meyr Çîn o

Îrfan Sîmserkîsij

Yew lajek beno. Seba debara xo arêye gurîneno. Rojêk êreyêk ra lajek û cinîka xo seba gureyê meşte kuwênî qalan. Lajek cinîka xo ra vano:

- Cinîk, eke siba şilî bo, ez şono arêye, eke weşî bo, ez şono hêga de cite keno.

Cinîke vana:

- Mêrik xeyrî ser vaje ke wa gureyê to xeyrî ser şîyero.

Lajek vano:

- Lîya cinîk, xeyr-meyr çîn o. Eke dijne varaye, ez şono arêye, xele tehneno. Eke hewa weş bo ez şono hêga de cita xo keno. Ehend!

Cinîke vana:

- Ez çi vaja? Wa bo.

Siba dîyeno hewa weş beno. Lajek estora xo pa hecetanê cite ya keye ra vecêno, yanî şono cite. A hele yew qumandar pa çend eskeran a yanî şono Dîyarbekir, rayîrê xo vîn kerdo û ameyo dewe keyeyê muxtarî. Muxtarî ra ardim wazenî. Seba ke ê rayîrê xo bivînî, yew rayber wazenî xo reyra. Muxtar keye ra vecêno yeno meydanê dewe ke yew merdim bivîno eskeran reyra ray bikero. A hele lajeko ke şono hêga cite, raştê ey yeno. Muxtar veng dano:

- Filan kes, hey bîye tîya!

Lajek estora xo ca verdano vaz dano hetî muxtarî ya. Reseno muxtarî het vano:

- Vaje muxtarê mi, vateyê to çina yo?

Muxtar vano:

- Lez bikewe nê eskeran ra ver, rayîr binawne înan, bibere Dîyarbekir.

Lajek muxtarî ra vano:

- Vateyê to sere û çimanê mi ser.

O ca de keweno eskeran ra ver, dewe ra vecênî. Dewe ra kewenî dûrî, yeno lajêkî vîr ke fîrarê eskerî yo. Lajek lebitîyeno ke senî eskeran re biremo. Epey yew raywanîye ra pey resenî yew neqebo teng, lajek xo bi xo vano, “Firsetê remayîşî no yo!” O uca de eskeran ca verdano, vaz dano ke biremo. O xeylek vaz dano, eskeran ra keweno dûrî. Na rewşe ser o qumandar emir dano eskeran:

- Şima se kenî çi kenî nê lajekî tepîşênî, nê remayîşî de yew gure esto. O bîlasebeb nêremeno.

Nê vateyî ser o eskerî kewenî lajekî dima, remayîşê lajekî havile nêkeno, eskerî ey tepîşenî, pey ser anî qumandarî het. Lajekî gênî xo reyra hetanî Dîyarbekir benî. Uca de ser kenî, sax kenî ke lajek firarê eskerî vecîyeno. Lajekî uca ra gênî benî esker. Aşmî, serrî ser de şonî, eskerîya lajekî qedîyena. Lajek teskereyê xo gêno, dewê ti ha ça ya? O keweno rayîr hetê dewa xo ra şono. Epey raywanîye ra pey reseno dewe. Şono verê berê xo û berê keyeyî kuweno. Cinîka ey yena peyê berî û vana:

- Ti kam î?

Lajek vano:

- Ber ake cinîka mi ez o, mêrdeyê to. Xeyrî ser ez ameyo...*

_____________

*No nuşte “Newepel, Rojnameyo kulturî yo 15 roje, Hûmare 26, Dîyarbekir, 15-31 adare 2012, r. 7” de weşanîyayo.

Na xebere 1287 rey wanîyaya
No nuşte hema şîrove nêbîyo.