zazaki.net
26 Temmuze 2021 Dişeme
Girdîya Karakteran : 12 Punto 14 Punto 16 Punto 18 Punto
24 Nîsane 2021 Şeme 16:01

Xem

Evdî Hesqera

Nêşino!

Eno bî çend reyî ke ez sîfon ancena la nêşino! Winî cayê xwu de mend...

Hhhhêêêuuoxxxoooêêêuuuşşşşşş!

Nê!

Nêşino…

O nêşino, ez zî nêşina.

Ez nêeşkena winî caverdî û bivecî. Bedo şi keyeyê waştîya xwu, la beno ke dima ez xwu vîr ra bikerî, o zî bêro bivîno. Zaf eyb o!

Rezervuar bi pir. Hela ez reyna biceribnî.

Hhhhêêêuuoooxxoooêêêuuuuuuşşşşşşş!

Nê!

Merdim vano qey sond wendo ke nêşiro!

Înad keno! Shit!

Wext zî wextêko normal bo, çiyêl nêbeno la winî zî nîyo.

Hela ez şirî balkone, biewnî dikanê Dêrsimijan ra.

Eke çiyêk çinê bo, ez do reyna bêrî biceribnî…

(Vîst sanîyeyî dima)

Hhhhêêêuuooooxxxoooêêêuuuuuuşşşşşşşşşşşşş!

Nê, teba çin o. Yanî nika çin o…

Eke bêrê, texmînê mi gore verê verkan do bêrê uca!

Cayanê winasiyan xeripnenê, talan kenê. Dima zî yenê keyeyan ser.

Xwura ê zanê kam kam o. Lîsteyê ma hemîne înan dest de yê.

Oooff!

Hhhhêêêuuuuuooooooooxxxoooêêêêêuuuşşşşşşşşşşş!

Merdim vano qey eno zî protestoyê pawitiş û roniştişî keno!

Sûcê ci zî nîyo, klozet bi xwu problem o. Pîsuwar keyf o, la klozet zilm o…

Hhhhhhhhêêêêêêêêuuuuuoooooooxxxxxxoooêêêuuuşşşşşşş!

Beno ke lînç ra dima merdimê mi bêre keyê, wa nêvînê, şerm o.

Hehee! Beno ke bêre bivînê la vacê “Enê xenzîran lacek kişt, dima zî keye pîs kerd!”

Hehe! Wa vacê…

Hela ez reyna biewnî teber.

(Des sanîyeyî dima)

Hhhhhhhhêêêêêêêêêuuuuuooooooooxxxxxxoooêêêuuuşşşşşşşşşşş!

Nê, nika kes çin o.

La mehlayan de bi konvoyan geyrenê. Kam kotî de cuyeno, ban û dikanê kamî kotî der ê, zanê. Şinê kuwenê, kişenê, talan kenê… Beno ke bêrê tiya zî. “Beno” çi yo, do bêrê. Wextanê weşan de ma xwu zaf bellî kerd, aaaxx! Ax ke ax! Eke bêrê ena mehla, do verê verkan şirê dikanê Zeynelî ver: Munzur Tekel. La eke ma bixelesî, ez do ci ra vacî “Nameyê dikane bike Dîcle”. O zî çemê welatê ma yo. La nêêêêê! Diyarbekir yeno merdimî vîr. Wa bikero “Ferat”.

Ez yew kardî bigêrî şirî Zeynelî het, ez se bikerî…

Yan di kardîyan? Ez nêzana…

Ê yenê, eno nêşino… Off!

Na xebere 302 rey wanîyaya
No nuşte hema şîrove nêbîyo.