zazaki.net
17 Tebaxe 2017 Panşeme
Girdîya Karakteran : 12 Punto 14 Punto 16 Punto 18 Punto
29 Temmuze 2012 Yewşeme 13:36

Ti Çinê ba

Dilo Bargiran

Ti çinê ba

Rojê mi benî sey şewe

Tarî pelûn xwu roneno rîyê erdî ser

Cu mi rê beno jehr

Zilûmat vila beno asmînî ser

 

Ti çinê ba,

Ez feqîr maneno kuçan di

Delû beno,

Serê koyan di xwu vîn keno

Mecnun beno

Çolan di aware-aware gêreno

 

Ti çinê ba,

Zimistan serdê xwu veradano ma ser

Seqem beno, ez rebişîyena

Wesar hêrs beno

Dar bê pel

Gulîstan bê gulan maneno

 

Ti çinê ba

Teqet nêmaneno ningan di

Giranîya bindestîye ma bêhal fînena

Huyayîş rîyan di nêmaneno

Bilbil kat weno, delû beno

 

Ti çinê ba

Hêgayê mi di telî har beno

Awkê mi lêl

Erdê mi ziwa beno

Tînce çilaya xwu vîn kena

Estareyî bêşewq manenê

 

Ti çinê ba

Ez mîyanî milletan di şermaye maneno

Çilayê hîvîya min şina hewn a

Derdî mi giran beno, milê mi ser di

Sey çêleyê adirî veşneno dilê mi

 

Ti çinê ba

Bawer bikir, ey zî nêbena

Ti mi rê sey nengû û goştî ya

Ti mi rê sey awa heyatî ya

Ez to di ameyo dinya*

____________

* Na şîîre “Newepel, Rojnameyo kulturî yo 15 roje, Hûmare 28, Dîyarbekir, 01-15 gulane 2012, r. 5” de weşanîyaya.

Na xebere 1814 rey wanîyaya
No nuşte hema şîrove nêbîyo.