zazaki.net
23 Tebaxe 2017 Çarşeme
Girdîya Karakteran : 12 Punto 14 Punto 16 Punto 18 Punto
06 Hezîrane 2010 Yewşeme 11:10

Teberik

[Hîkaye]
Alî Aydin Çîçek

-1-

Asmên hîra yo, koyî berz ê, şewe tarî ya…

Aşme şewle dana şewe û pepûg waneno. Dûr ra dûr vengê tifingan êno, vengê cengî… Va pelanê daran ra oncîno û şono. Asmên ra astareyî bereqînê. Binê yew dara valêre de yew merdimo kokim û yew lajek.

-2-

Kokim cêraya lajekî û vat:

- Ero bawo, bawo! Ma ez meberbî wa kam biberbo. Zereyê mi veşeno, cîgera mi dejena, cîgera mi…

Lajekî bêveng sereyê xo kerd xo ver û bêveng winî vinet.

Kokimî reyna ver kerd ci û vat:

- Ero bawo, bawo! Cîgera mi dejena, cîgera mi… Lajê mi, kêna mi; can û rîyê mi mîyanê nê cengî de şî…

Kokimî vileyê xo kerd çewt û berma.

Berma…

Hesirê çiman sey şilîya wisarî varay herdîşa sipîye ser. Peynîye de lajekî dayax nêkerd û qaytê rîyê kokimî kerd û ey ra vat:

- Kalo delal, de mi ra vaje, mîyanê nê erd û asmênî de, binê tîja Homayî de derd û kulê kamî çin o? Derd û kulê kamî çin o ke wa meberbo. Her kes wayîrê yew derdî yo, wayîrê yew janî… Teyrûtur derdê xo rê waneno serê dar û kemeran de.

Kokimî sereyê xo kerd berz û hesirê çimanê xo kerdî pak. Şopê winî vinet û dime ra vat:

- Heya lajo heya, vatena to raşt a; pepûg şew û roje xo rê wanêno, derdê xo rê, janê xo rê… Ez se bikerî, kamta şorî; di cîgerê mi mîyanê nê cengî de, mîyanê nê adirê bêbextî de veşay… Vaje lajo, vaje mi ra ez se vengê înan, ez se boya înan xo vîrî ra bikerî? Ez se çimanê inan xo vîrî ra bikerî; ê winî verê çimanê mi de, hewnê mi de, xeyalê mi de…

Vinet… Vinet û berma. Xeylê wext sey domanan winî berma. Dime ra destê xo kerd cêbê êlega xo û yew teberik ci ra vet. Defê-di defeyî paç kerd û berd çareyê xo. Teberik kerd mîyanê lapa xo û zixm şedina. Dime ra va:

- No teberik domananê mi ra, mi rê mend; tenya no înan ra mi rê mend. No teberik bovokê min o. Heyan ke bimirî no lewê mi de yo. Heyan ke…

-3-

Lajekî vengûvaj xo ra birna û goş na vengê vayî ser. Asmên ra aşme şewle dayêne şewe.

Tenik-tenik va ameyêne. Vengê vayî de vengê tifingan, vengê cengî… Va ameyêne û pelê dara valêre sivik-sivik verê sura vayî de reqesîyayêne.

Xeylê wext mîyan ra derbaz bî. Merdimê kokimî sereyê xo verva bi asmênî kerd berz û qaytê aşme kerd. Roştîya aşme hesiranê çimanê ey de bereqîyayêne. Kokimî xo bi xo bêveng va:

- Ax dinya! Xwezila ez zî pepûg bîyêne û dima vayî, dima şilîye winî şew û roje mi janê xo to rê biwendêne.

Na xebere 2008 rey wanîyaya
ŞÎROVEYÎ
derdan
aziz
bırakîmin delal!!! onû nûştuxi tu zaf veşbî...destu u lîngı tu zerguni bî. homay ferset bıdû kelmay tû.
13 Hezîrane 2010 Yewşeme 15:15
Rojatari
rojatari
ere şima kayé zaf haber nikené ma buvoné ....... ma haber vazené
06 Hezîrane 2010 Yewşeme 15:35