zazaki.net
20 Tebaxe 2017 Yewşeme
Girdîya Karakteran : 12 Punto 14 Punto 16 Punto 18 Punto
09 Kanûne 2009 Çarşeme 15:32

Şîretê Şaîrî

[Şîîre]
Xerîbzeman

I

Hero camêrdo! Pay bide erd ro tif bike

Zaf Nemrudî binê linganê to de yî lanet bike

Meyxane ra mevecî, birîna esaretî daru bike

Dinya Silêmanî rê zî nêmenda, çîk derd meke

 

 

II

Bira! Semedê na dinya derd meviraze

Binê na dinya diryayo, derz meviraze

Gonîya engure firr bike, qet ceng meviraze

Zenge deke milê aye ra xo rê şeng viraze

 

 

III

Zemano ke vîyart û şîyo pê ax meke

Meşt zî nêameyo pê wel-wele meke

Xeyalê vizêr û meşt rê xo wêran meke

Enka roşan bike, demê xo îsraf meke

 

 

IV

Tim û tim xerepêno saz beno eno ca

Zanayîşo mutlaq çin o megêr îta uca

Pirrnikê xo biveşne, karê xo zî bîya ca

Zûrî meke, fekê xo biderz meşo her ca

 

 

V

Şewşewoka şewreng de xelwet çin o

Merdimê kîninî rê huyayîşê rojî çin o

Merdimê hesudî rê cayêk de lezet çin o

O ke çikod û zikrut o, ci rê mirdone çin o

 

 

VI

Mêriko kîbr ra dûrî şo! O gelêk ehmeq o

Vano qey reseno koyan, erd qul keno

Cor ra ewnîyeno, pirrnike zî berz keno

Şeytan ci ra remano, o nêzano se keno

 

 

VII

Mal û milk arêmedîn, willahî adiro sûr o

Tim o ke merg esto, her çî jehr û ziqum o

Derd, hurdi-hurdi vareno, eno ezabo pîl o

Homa ma ceza keno peyen mewt û kul o

 

 

VIII

Axirê zeman o, dostanî çewî de nêbena

Zindewarî zî zalim a, ci ra umud nêbena

Lo embazo! Pê ena qine camêrdî nêbena

Xo rê zaf biwane! Bê qeleme doze nêbena

 

 

IX

Boya tifilê binê şuşa ra ma serxoş bîy

Her çî ra ma fek vereda, ma zerrweş bîy

Perey çin î, meyxanan de ma rehîn bîy

Guneyê ma şuyayî, ma pank û temîz bîy

 

 

X

Ehlê mey bîyayîş, her ca de azadî ya

Haya geyrayîş derd o, rakewtiş bextîyarî ya

Remayîş yew şeref o, mendiş zî risîyayî ya

Qanûnê felekî no hawa yo, dinya eware ya

Na xebere 1721 rey wanîyaya
No nuşte hema şîrove nêbîyo.