zazaki.net
20 Tebaxe 2017 Yewşeme
Girdîya Karakteran : 12 Punto 14 Punto 16 Punto 18 Punto
06 Oktobre 2009 Sêşeme 10:45

Selahedîn

[şîîre]
Serdar Roşan

 

 

torinê eyubî

lacê necmedînî

warzayê şêrkoyî ya

mîrekîya şedadîyan ra

kurdêko koyic

eslen serhedî ya

kekê adilî

datê teqyedînî

babîyê ezîzî

keyeyê eyubîyan ra ya

 

sultanê împeretorîya eyubîyan

qahîre ra heta bi wan

hukumdaro dadperwer ez a

şimşêro mahîr dest de

o ke sîna de estorê xo vazdneno ez a

kîşta datê xo şêrkoyî de esparê mehîna boze ez a

 

deşta hîtinî de ez a fermandar

vera min de vinderto frengo dijwar

lek bi lek yenê espar û peyar

kelkela germî qijêlnena çol û beyar

verê şewqê rocî de bereqênê rim û şimşêrê neyar

halan dana dost û yar

 

germ o

kelkela rocî ya

erd zaf sincirîya

sebir û zanayîş bi pîvan ê

ordî hemberê yewbînan ê

qet eman çinê yo

espar û peyarê min bi hêvî yê

dijminî deşta hîtinî de bi kîn ê

roc rocê ciwamêran o

şerêk qewmîya halan o

halanê mîrê înan o

halanê espar û peyaranê kurdan o

  

espar:

eskerê ordîya eyubî ez a

esparê estora boze ez a

bi tîr û keman ez a

şimşêro kalan de ez a

torinê kurdê merwanîyan ez a

hîmdarê kela farqînî ez a

ronayoxê birca amîdî ez a

pî û kalikan ra hûrî ez a

o ke verê şewqê rocî de bi bawerî yo ez a

erdê kurdîstanî ra ez a

o ke vano selahedîn o sultan, ez a

 

peyar:

ez a dest bi şimşêro sûr

ez a citêrê dewa hûr

ez a dest bi rim

sereberz a hertim

lek bi lek şina

dijminan rê erzena tîran

ez a şiwaneyê berxan

ez a kesaxê rezan

ez a şarê dewa xerzan

ez a dewicê koyê berzan

ez a welatîyê teyrê bazan

erdê kurdîstanî ra ez a

o ke vano selahedîn o sultan, ez a

 

 

mîr:

ez a mîrê hekarîyan

wayîrê tac û kelehan

ez a mîrê botan

wayîrê medrese û dîwan

ez a mîrê keleha xoşawî

bi çim ewnêna behrê wanî

ez a mîrê farqînî

mi ver ra terqîyayî dijminî

erdê kurdîstanî ra ez a

o ke vano selahedîn o sultan, ez a

 

 

welat:

dîcle û ferat ez a

cîlo û sîpan ez a

adirê zerreyê agirî ez a

keştîya cûdî ez a

keleha hewlêrî ez a

seyrangehê nemrûdî ez a

dêsê bedenê dîyarbekirî ez a

deşt û ko û zozan ez a

erdê kurdîstanî ez a

dadîya sultan selahedînî ez a

 

selahedîn:

o ke erdê kurdîstanî ra yo ez a

pî û kalikan ra serhedî zî ez a

hikmdarê qudsî ez a

mîyanê tarîxî de

dadmend ez a

qet bi xirabî fikir nêkena

merdimperwer ez a

ê ke bawermendanê cîyayan rê

berê qudsî akerd ez a

rocawan de şovalyeyo bêqisûr ez a

rochilat de mêrxas û ciwamêrd ez a

ez wayîrê sozê xo ya

rîkardê zerrîşêrî ra bipersê

metranê îsewî ra bipersê

qiralê frengan ra bipersê

her reng merdiman ra bipersê

hahamê cuhî ra bipersê

înan pernayne sereyî semedê dînî

min arde aştî û seypêyî

wa ê şima rê vacê, torinê erdê kurdîstanî

wa ê şima rê vacê, împeretorê eyubîyan, ey sultanî

 

Payîz, 2003
Na xebere 1948 rey wanîyaya
No nuşte hema şîrove nêbîyo.