zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
08 Kanûne 2019 Yewşeme 17:08

Qurban

Evdî Hesqera

Se kerdbi, senî kerdbi ez nêzana la amebi şîrket de kewtbi kar. Departmanê mi di nêbi la gama merdim reyêk-di rey eynî şexsî bivîno, eke qisey nêkero zî beno şinasnaye. Meseleya ma zî winî bî.

Her ke ez şiya teber ameya şîrket, verê kêberî de bi. Her wext tenya bi. Destê ci de yan çay yan cixara yan zî çay û cixara. Personelî gama bivecîyê bêrê cixara bişimê, veng danê yewbînî. Kam kamcîn marka şimeno, kam nêşimeno anceno yan kaş keno ferq nêkeno, zafê merdiman gama şinê verê kêberî, pakêtê cixara, meseleyanê kulkulîke û helbet ekîbê xwu zî xwu dir berdêne. La o tim tenya bi. Tenyabiyayişê ci rê zerrîya mi veşaye. Çend rey mi bi sereyê xwu silam da ci. Keyfê ci bi weş, ey zî zerrî ra miqabele kerd. O wext mi fam kerd ke verê mi yewî çiyêko winasî nêkerdo.

Fina tenya bi, guneyê mi pê ame. Ez şiya ci het, mi silam da. Ey silamê mi girot, ma merheba da yewbînî. Ey Marlboroya xwu -cixara nêbî, Marlboro bî- îkram kerde la mi serrêk verê cû ra titûn ra fek veradabî. Mi persa, unîversîte qedênabî, xalê cinîya ci patronî ra rica kerdbi ke bikewo şîrket. Xebera ci çinê bî la departmanê ci cayêko zaf basît bi. Yanî zereyê keyeyî de zey cayê sewlan. Mi çiyek nêvat, mi nêwaşt moralê ci bixeripnî, ey zî nêpersa.

Çend rey winî ma yewbînî dî, tayn suhbet kerd. Rocêk mi va nûştişê projeyan bimûse, ti do rew terfî bikerê. Vat e. Mi vat eke ti wazenê ez to rê zey nimûne çend dosyayan birişa, hele biewnî ma senî virazenê, ti zî winî bike. Eke şef îqna bibo ti eşkenê prîm zî bigîrê. Vat e. Mi mailê şîrketî ser ra ci rê çend projeyî erşawitî, çend nimûneyê şenikî bî. Teşekur kerd.

Dima her ke ma raşt ameyî mi persa hele se kerd, ewnîya projeyan ra yan nê. Reyêk vat qicê mi bî nêweş, mi nêeşka; reyêk vat cinîya mi emelîyet bî, mi firsend nêdî...

Mi ewnîya her ke ez persena qeza-bela yeno keyeyê ci ser, mi caverda. Xwura ey zî êdî çend embazê cixara xwu rê peyda kerdbî...

Verê serrneweyî mi eşnawit ke şîrket do çend merdiman kar ra bierzo. O zî lîste de bi. Guneyê mi ci rê ame. Mi şefî rê vat meerze, vat nêgurweyeno, xwura çimê ci zî kar de nîyo. Zamayê merdimêkê patronî yo, ey qey xatirî ard, sîgortaya ci viraşte la mêrdek tenbel o. Mi vat qicê ci nêweş o, cinîya ci emelîyat biya. La şef seke vaco "O zûrî keno, to xapêneno" ewnîya mi ra.

Çend rey embazan vatbî ti merdimêko zerrîpak ê, rew yenê xapnayiş. Herhal fina zî çiyêko winî bî.

Serrneweyî ra dima zî merdimê ma ame şi. Çend rey ame masaya mi ser, halê mi persa. Reyêk vat mi CVya xwu arde da şefê personelan, reyêk vat mi proje nûşt teslîmê midûrî kerd...

Rocêk ame vatiş ke patronî emir dayo bekçîyê verê kêberî, vato merdimo ke ma tîya ra vet wa nêkewo zere. Tabî merdimê mi nêame. Halê dinya yo, gama merdim nêvîneno rew vîr ra keno. Mi zî o vîr ra kerd.

Çend aşmî dima terfîyê mi ame, ez biya şef.

Rocêk mi dî bekçîyê ma telefon kerd vat meymanê to ameyo, bê bivîne. Mi vat kam o, wa bêro odaya mi. Vat filankes o. Patronî talîmat dayo, ez nêeşkena bigêrî zere.

Ez şiya ke heqîqeten o yo, verê kêberî de yo, destê ci de zî yew dîk esto! No çi hal o, ya Rebî. Lingê heywanî girotbî, berz kerdbî. Mi dî huya û vat ino şîrket de to ra başêr merdim çin o. Ez înan pêrune û inê dîkî kena qurbanê to. Dima kardîya xwu vete, xirt xirt xirt dîk serebirna.

Ez şok biya, winî menda...


Na xebere 2076 rey wanîyaya
No nuşte hema şîrove nêbîyo.