Qorxma Sonmez!

Qirixanê Dêrsîmî ra Vîlik şono esker. Roja virene ê ke newe amey pêro vejînê îçtîma. Qor bi qor vindenê. Qumandar kî bojîyê xo semernayê we, destê xo este peyê xo, yeno û şono. Deqa de reyê yewî kaş keno hetê verî û ci ra pers keno vano:

- Nameyê to çiva wo, kotî, key bîya?

Yek de çim gineno ro Vîlikî. Tene mote ci ke beno, desin de tede vejeno ke no tene qirix o. Veng dano ci, vano:

- Gamê avê vejîye!

Vîlik avê yeno, selam dano, verde vindeno. Qumandar name, ca û serra bîyayîşî ey ra pers keno. Vîlik tek bi (ve) tek cewab dano. Qumandar tene dûrî vindeno ey ra vano:

- Marşa îstîqlalî biwane!

Vîliko feqîr qet teba (tiwayê) fehm nêkeno. Ziq beno goşanê xo verdano ro vindeno. Qumandar reyna zirçeno vano:

- Marşa îstîqlalî biwane!

Vîlik tiwayê fehm nêkeno. Qumandar kî vano no Dêrsîm ra yo, belka şoresger o. Qebul nêkeno, yanî tavir gêno, bi zanayîye nêvano. Qarîno beno sûr û çirr. Girmika xo bar keno ke piro do.

Qora peyêne de yew (ju) dêrsimijode bîn beno. Vîlikî rind nas keno, zaneno ke Vîlik sîyaset, polîtîka û çîyo winî (henên) nêzano. Desin de fehm keno, zano ke aqilê Vîlikî era perse ser nêşîyo. Fiskîye kewna ra ci huyeno. Eke huyeno Vîlik gêreno ra ci, vano: 

- Nêro marşa îstîqlalî çik a?

Hevalê ey dijdîya ci ra vano:

- Ero korxma sonmez a, korxma sonmez a.

Naye ke hesneno, Vîlik desin de dest pêkeno vano:

- Korxma sonmez…