Qedênayîşê Dawa

Salê Ap Silî kênaya Ap Hesê Keyê Hesan remnaybî. Giregirî û pîlê ê dewan amey xo eşt Ap Husî ke dawa virazîyo. Na rey verî ke milet bîyero keyeyê înan, Ap Husî her hîrê lajanê xo ra va:

- Şima wayîrîye ro waya xo nêkerde, şarî remna berde. Mi rê eleqe nêkeno! Şima dawa virazenê nêvirazenê, cehennemê şima ra! Ez eleqe nêkena.

Milet ame oda de ronişt. Pîlan, giregiran rica kerd ke wa seba xatirê înan mesela cayêk de bibestê. La lajanê Ap Husî va:

- Ma Salî kişenê!

Mêmanan kerd nêkerd, tu çare înan de nêdî. Ap Hus quncik de ronişte yo, heredîyaye yo. Xo anto pêser bîyo lepêk. Sey paşayê kerrî pitî xo ra nêvejeno. Lajê ey zî vateyê “Ma Salî kişenê!” ra wetêr sewbîna çîyeke nêvanê.

Hetanî mîyanrojêk pîlan û giregiran nesîhet kerd, se va, çi va la tu havile nêkerd. Lajê Ap Husî yê xo ra kerte apey nêşîy, vanê “Ma Salî kişenê!” û çîyêna nêvanê.

Axir mîyanroje de werd amade bi. Sifre de ronîya. La mêmanan linge şana erd, va:

- Eke şima dawa nêvirazê ma nanê şima nêwenê!

Lajanê Ap Husî va:

- Şima wenê nêwenî şima zanê. Ma Salî kişenê!

Mêmanan va:

- Solanê ma rast bikêne, estoranê ma tewle ra vejêne, ma şinê.

Lajanê Ap Husî va:

- Şima şinê nêşinê şima zanê. Ma Salî kişenê!

Mêmanan hêz da xo ke werzê û şirê. Ap Hus çimê ey ziq ha sehena bulxurî de. Vêşanîye ver zereyê ey nesilîyayne. Qalind zî kerd xo vîrî ra. Nişka ve ra veng gina piro, va:

- Dawa qedîyaya. Lîlahîlfatîha…