zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
29 Kanûne 2019 Yewşeme 12:53

Qeda Bigino Cesaretê Min ê Medenî ro!

Evdî Hesqera

Na rey çiyêko weş bi, mi fina Chek in belaş kerd la sîstemî peynîya teyareyî de ca da mi ke baskî ser o nêbi. Reya verîne bî ke baskî ser o nêbiyêne! Mi va şikir, ez do nika dorê Îstanbulî bivîna la heta ke ma peron ra vecîyayî ameyî pîstî ser, davîst deqayî şî. Labelê velika mi nêverda ez manzara ra zewq bigîra, çi heyf...

Gama teyare wurişt, mi ewnîya camêrdo kişta mi de ho telefon de futbol kay keno. Hetê bînî de zî merdimêko çewres yan çewres û panc serre roniştbi. Ey zî kitabê xwu akerdbi, mi dî verê çila de çimanê xwu rê zilm keno, xwu kor keno. Mi xwu zerrî de va lawo hende bol mewane, ti do kor bibê ha!

Mi va velike do mi bikişa, şerm-merm, ez rica bika ke şirî teber. Mi vat, înan zî vat “Hay hay.” Ez şiya ameya, genco futbolhez kewtbi cayê mi. Çiyêk nêbeno, mi rehet kerd, dinya biye hîra, verê camî çi yo...

Ez kewta orteyê înan. Mi dî wendox wazeno suhbet bikero. De mi va wa cesareto medenî para mi bo, mi persa va “Ti çi kitab wanenê?”

Aha! Êdî herbî dest pê kerd...

Mêrdek çewres yan çewres û panc serrî bî ke qisey nêkerdbi. Heme çekuyî û derd û meseleyê xwu daybî arê, pawitbî ke ez bipersa!

Fekê ci zî hende boyin bi, hende boyin bi ke ez merda!

Mi sereyê xwu hende kerd berz, pirnika mi hewt qatî asmîn û qatê ozonî ra vecîya!

Mi va boye ra xelisnayîş çin o, qet nêbo ez goştarî bika ke behsê çî keno.

Mi dî ke vano "Luksemburg, teyare, lacê mi…" Aha! Key words bî temam. Ti qet meraq meke, kokimo ercaye û boyin, helbet ma xwu rê bineyke suhbet kenê!

Hamburg ame mi vîr, mi analojî kerd: Luxemburg bajarê Almanya yo, ne?

Allah, Homa, Heq û Kosmos belayê xwu dabi mi, ez senî hende cahîl biya yaw!

Luxemburg dewlete bî! De ez çi zana, Bongilan û Bîngol nîyê û ez çîrvîla zî nêwena...

Xêrê Allayî, genco ke futbol de dinya vîr ra kerdbî, o teşqeleyê ma de kincê xwu bedilnaybî, pelerînê xwu yê Supermanî eştbî paştîya xwu, ame:

-Ez Luksemburg de biya pîl… (Zereyê mi de eşîrekê hetê Colemêrgî dest bi veyve û govende kerd.) … mektebê mi Luksemburg de, keyeyê ma hetê Belçîka de bi, la sînor-mînor çinê bî. (Aheeyy aheeyy!) Dima, ez Îtalya de, Fransa de, Hollanda de zî menda. (Axa ame, heme eşîrîan dest eşt tifingan, tîlîlîîîî….)

Ey vat, mêrdekê fekboyinî goştarî kerd, mi oksîjen ant...

Ox ya Rebî! Tayn mendbî ke ez maskeyê oksîjenî bigîra!

La boyin winî nêmend, kontr atak kerd!

O jî şibi Almanya...

Gênco zî şibi: Almanya de nifûs extîyar beno. Eno semed ra dewleta almanan tersena ke welatanê bînan ra karkeran bigêro.

La Gênco ti çimê min ê lawo, dewam bike!

Parîs mehf biyo, hende qelebalix o ke merdim nêşeno rehet bikero.

E, to raşt vat, nika Marsîlya weşêr a…

Lyon zî weş o la mi Prag ra bol hes kerd. (La ti Fransa ra senî şî Çekîstan, hey fekboyin!)

Supermenî êdî cewab nêda. Pelerînê xwu vet, fek û zinca xwu piştî.

Mi çimanê xwu pada, vî Homayî çew nêşeno mi bixelesno... Yûnis Pêxember pîzeyê maseyî de, mase binê dengizî de; ez zereyê teyare de, teyare duwês hezar fîtî hewa ra...

Supermen zî nêbî çare, mêrdekê fekboyinî teyare kerd Çernobîl!

Gama teyare resa erd, mi sond wend.

Mi va qeda bigino cesaretê min ê medenî ro! Mi cesaretê medenî ra fek verada, mi ci ra îstifa kerd.

Na xebere 1950 rey wanîyaya
No nuşte hema şîrove nêbîyo.