zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
20 Adare 2021 Şeme 16:46

Portre

Evdî Hesqera

Zinca ci ya zey patetêzan vana 'Ez Laz a' la heta nika fekê ci ra çiyêko winî nêvecîya. Çimjapon nîyo la bi israr vano “Ez Japon a, miletê mi miletêko zaf pîroz o.” Gama ez behsê ziwanê xwu kena, mi ra hêrs beno, dîrekt çiyêk nêvano la dişmenîya xwu bi hereketan bellî keno. Qayil o her kes zey ci bibo Japon.

Daçewres serre yo la zey gencêkê davîst serreyî têwgeyreno, qayil o xwu winî bido qebûlkerdiş. Mesela, porê kalekanê sereyê ci biyo spî la seba ke bellî nêkero, her di hetan tim bi makîneyê hîrê numee rût keno. Xwura cayo bîn de zî hende gijik çin o, la fina zî jole keno. Gama qisey keno zî ge-ge vano “Ez spor kena, mi spor kerd, vizêr gama mi keye de spor kerdêne…”

Sibayan gama ma dekewenê şîrkete, orteyê X-Ray ra vîyareno. Cîhaz her roc sînyal dano, o zî her roc vano "Ez bê tabanca nêgeyrena haa!" Ma zanê, pîyê ci emnîyet de wezîfedar o, bi tabancaya ey yeno kar. Xwura bekçîyo feqîr zî cesaret nêkeno ci rê çiyêk vaco.

Her ca de çend tene embazê ci estê, yanî winî vano. Suhbetan de eleqe û kopmozîsyon muhîm nîyo, heme wext vano “Mi filan wekîlî dir qisey kerd. Mi bêvan wekîlî dir qisey kerd. Filan wekîlî mi dir qisey kerd…” Eşkeno heme permutasyon û kombînasyonanê ci vîst sanîyeyan de, miyanê cumleyan de tekrar bikero…

Wazeno heme cayan de bibo şef. Tenya kar, şîrket qîmê ci nêkeno, servîs de zî heta ma biresê mehlaya xwu eynî waştişê xwu ser o israr keno. Mesela, şofêr Erebeko Herranij o. Gama stajyerê zaf coolî nişenê servîs, Tirkîya ci rew qedîyena. A sanîya de şef hazir o, hema midaxele keno. Dima, midaxeleyê xwu derg keno, şofêrî re rayir tarîf keno: "Raşt şo! Dewam bike! Lambaya sûre, vindere! Nika çep! Ez enê semtan zaf weş zana, ti goş bide mi, navîgasyon çi yo..."

Cînî, xedemeyî û garsonî xaric pêro însanan xwu rê zey reqîb hesibneno. Mesela, merdimanê xwu ra des serrî girdêr ra vano "Hesen bê, Husên şo, Mihyedîn ti peynî de ronişe!"

Biyo Japon û Japonîya xwu ra mirdî xêr vîneno…

Na xebere 1029 rey wanîyaya
No nuşte hema şîrove nêbîyo.