zazaki.net
19 Oktobre 2017 Panşeme
Girdîya Karakteran : 12 Punto 14 Punto 16 Punto 18 Punto
24 Hezîrane 2011 Îne 11:14

Pisînga Terorîste

Cemal Azij

Yo ruej Xid row ra wurzen, dadê xu ra von, ez şin heya qeza. Dadê Xid vona:

- Ti hê şin, îna pisînge ma zî ber, teber qeza di verd.

Xid pisînge depişen, deken zerê yo towrî. Nişen dolmîş kuwên cehdi. Zerê dolmîş id dewijî Xid ra persên von:

- Zerê towrê to de çi esto?

Xid von:

-Pisîng a.

Dewijî von:

-Ti hê pisînge benê ça?

Xidi iz bi yarî vano:

- Ez ben ci r’ yo cuzdan vejên. Şima zan orfi îdare ameyo, cuzdan kerdo mecburî!

Yen nizdê qeza, cendermey erebê yin vindarnên von:

- Bêrê war! Ma şima gêrenî…

Xid û embazê xu pîya yên war. Di hebî cendermey şin zerê dolmîşe. Lingê yin ginên towri r’, pixî ginen pisînge r’, xu leyr kena. Zarê cendermû teqen, xu erzen teber dolmîşe, fekser xu arzen erd.

Qumandan baren cendermû ser, von:

- Se bî şima, în çi hal şima w?

Cendermey von:

- Zerê dolmîş id yo towri est, cayê xu d’ nêvinden, ben berz, howna ginen ardi r’.

Başçawîşê cenderman baren von:

- Towri ê kamî yo?

Xid von:

- Towrê min o.

Başçawîş von:

- Zerê towrî d’ çi esto?

Xid van:

- Pisînge esta.

Senî gi Xid van pisînge esta, başçawîş cenderman ra von:

- Xu berzên sîper, lez!

Cendermey xu erzen sîper, başçawîş xu erd ro kaş ken, şin verê yuzbaşî. Yuzbaşî tersî ver xu eşto peyê kerra, sîper guret. Yuzbaşî persen von:

- Wezîyet çine w, mi ra vac.

Başçawîş vano:

- Qomtanê mi, ti bê ki bomba dekerda zereyê pisînge, gêren qonaxê hukmatî bomba bikêr.

Yuzbaşî von:

- Baş bi ke ma pêhesay. Inkê z’ gere ma xeberi bid pîlan xu.

Pê telsiz xeberi dan qomutanê alaye û qeymeqamî, von hal û mesela ana wa.

Qomutanê alaye û qeymeqam yen anên cendermey hê sîper id.

Qomutanê alaye yuzbaşî ra von:

- Wahîre towrî wa bîyer tîya.

Xid şin verê yin. Qomutan Xid ra van:

- Kûmî bomba dekerda zerê pisînge, ma ra vaj!

Xid von:

- Zereyê pisînge de bomba çin ya.

Qomutan yo paskil don Xidî r’, von:

- Kutik lac kutikî, ti kûmî xapnên, zerê a pisînge honî yo pir bomba, pisîngê şima kurdon zî terorîst ê.

Xid von:

- La wilay pisîngê mi terorîst nîya. Tena dizd a, toraq şor nimnena wena. O semêd ra mi arda ez îta vêrdî.

Se kên-nêken Xid çîyê qewul nêken. Qomutanê alaye Xid ra vano:

- Şû ma r’ o towri bîya!

Xid şino gi towri bîyaro, qomutanî şinê yo cawo berz. Xid şin zerey dolmîşe, towri gên xu dest, yen war. Tersan ra destê Xid rejfên, towri dest ra kon war, lêr ben. Pisînge tersena, xu bi zor towri ra vejena û remena. Qomutan baren cendermon ra von:

- Terorîst remen, panîn bikşîn!

Pîyer pîya tifingûn nûn pisîng a, pisînge kişen.

Na xebere 2472 rey wanîyaya
ŞÎROVEYÎ
fatimiler@hotmail.com
fatma çeliktepe
gercekten güzel bu hikaye,zazaca için degerli adımlar bunlar
15 Êlule 2011 Panşeme 00:58