zazaki.net
24 Teşrîne 2017 Îne
Girdîya Karakteran : 12 Punto 14 Punto 16 Punto 18 Punto
15 Teşrîne 2011 Sêşeme 12:54

Peleyê Vewre û Hesrê Mi

Remezan YALINKAYA

Yew pêlê behrî senî berz beno û yew vadanî gêno zereyê xo de keno vindî, zerrîya mi zî mîyanê yew pêlê xewfî de temerîyena û tarîyê nê tersî de zî reyna heskerdiş, vera eşqî de recefîyayîşî ra fek vera nêdano. Ez zana destê mi ra çîyêk nêno û na qebul nêbena, ez zana rayîrî qefelnîyaye yê û cuye vernîyê şabîyayîşî de dame ronaya. Senî bibo zî hêvîya zerrî sey girdbîyayîşê varanê wesarî û zêdeameyîşê xeleyê hamnanî merdimî kena keyfweş û sewbîna rayîran akena, rayîrê roşnî virazîyenê. Rey-rey merdiman rê çîyanê xiraban kena û nefîkerdiş eke aver de reyna biqesedîyo na xirabin kena û no merdiman rê se keno, şermeyê xo pê çi nimneno û ez nê halê xo rê bermena, huyena, badê zî dirîyîya zerrîya xo rê û tewiranê cuye rê. Ge-ge zî qedexe kena yarî û heskerdişî, bêrîkerdiş û fikirîyayîşê waştî. La nêbeno reyna zî. Mojê yew laserî ke vernî nêgirîyena eke mi ci rê bend viraşto, gêna vernîyê xo bena û mi tenya verdena, verê eşq û heskerdişî de. Yew demî de zî fir dana şîyena ra, yew desto germin tepiştiş ra û wanîyayîşê çimanê xorînan ra. Nêana xo vîrî ay çimî yew roj, çi dem de yan bivînî xo nimnenî û ay destê germinî benê cemed, nêtepişîyênê.

Zerrî hişê merdimî kor kena, hewnanê kê gêna peyê berê xo û eke ti qayîl bibî zî to vîr ra nêşina, hewnê aye ana vîrê to, to hewn ra weriznena.

Teber ra varan vareno û pixêrî de kilê adirî. Hewnê kê vîrî ra şîyê, dejê nimiteyî û weşî vîyarenê. Pixêrî ra kilê adirî perenê hetê zerrî ra û tanî danê, veşenê. Varan çilkeno, xo erşaweno cor ra, serd dano, hewn a keno. Serdûgerm kewenê têmîyan, şîrgerm benê û rayîrê xo vindî kenê. Ez pawena û hêvîya xo ganî tepişena.

Teber ra varan vindeno, vewre dest bi varayîşî kena. Peleyê vewre ginenê rîyê mi ro, benê awe û şinê war hetê zerrîya mi ra, cemednenê, benê zêde û hesiranê mi dir mi xeneqnenê.            

Na xebere 1578 rey wanîyaya
No nuşte hema şîrove nêbîyo.