zazaki.net
17 Teşrîne 2017 Îne
Girdîya Karakteran : 12 Punto 14 Punto 16 Punto 18 Punto
16 Hezîrane 2012 Şeme 09:43

Nuşteyê Edîtorî yê Rojnameyê Newepelî-28

Roşan Lezgîn

Gerçî tayê embazan verêna nuştêne la hetanî par-pêrar hepisxane ra bi kurdkî nuştiş qedex bi. Înanê ke nuştêne, nuşteyê xo bi rayîrê avûkatanê xo yan bi hawayêkê nimitkî şawitêne teber. Nika hepisxane ra şawitişê nuşteyanê kurdkî serbest o. La yewna problem esto!

Ez mektuba Umer Farûq Ersozî ra neql bikî. Umerî mektuba ke roja 19.04.2012 de mi rê şawita de bi tirkî wina vano: “Roşan bira merheba. Sewqê mi Çewlîg ra vejîya bi Dîyarbekir. Tîya qerdîyanê ke lehçeya kurmanckî de tercumanî bikê estê. Çi heyf ke zazakî de çin ê. Ez şîya mudirî het. Ma qisey kerd. Va, ti eşkenî nuşteyanê xo bişawî la ganî verî bêrê tehqîqkerdiş. Ez nêzana ke do bişawî kotî, tercume bikî. Mi va, no gure çiqas biramo? Va, hîrê-çar aşmî vîneno.

Yanî, eke Farûq mi rê bi kirdkî yew nuşte binuso. Îdareyê hepisxaneyê Dîyarbekirî seba ke fehm biko tede çi nusîyayo, Homa zano do bişawo kotî. Heta uca tercume bikê û apey bişawê hepisxane. Îdareyê hepisxaneyî tede çîyêko xirab nêvîno, hema bişawo teber. Tabî, normal o ke çend aşmî dom bikero!

Umer nuşteyê xo de wina dom keno:

Sey çareyêkê muweqetî, ma wina pêkerd. Eke ez bi xo nuşteyê xo, binê her reze de tirkîya ci zî binusî, beno ke qerdîyanî fehm bikê.

Tabî, mecbur mendo, mektuba xo bi tirkî nuşta. Yew hîkayeya qijkeke zî bi kirdkî nuşta la tirkîya her cumle zî kîşte de nuşta.

Pêrar gama ke reya verêne embazanê ma hepisxaneyê Çewlîgî ra nuşt, ancî wina problem vejîyabi. Mi zî yew mektuba rexneyîbi tirkî nuşte ke senî hende qerdîyanê kirdî uca estê û senî nêeşkenê yew mektuba kirdkî biwanî? Mi va alfabeya ma û yê tirkan se ra heştay yew a! Axir badê ke Newepel zî vejîya, vera-vera qerdîyanê ma yê Çewlîgî musayî wendişê kirdkî. Êdî nuşteyê kirdkî hem hepisxaneyê Çewlîgî ra rehet yenê hem zî ma bi xo ê embazan rê bi kirdkî nusenê.

Ez baş zana ke hepisxaneyê Dîyarbekirî de gelek qerdîyanê kirdî estê. Seke Farûq zî mektuba xo de vano, nê qerdîyanê kirdî eşkenê lehçeya kurmanckî de tercumanîye bikê la nêeşkenê kirdkî biwanê!

Madem mi behsê hepsîyan kerd, ez wazena yewna mesela zî qisey bikî.

Çend nuşteyê peyênî ke hepisxaneyê Çewlîgî ra ameyî, CD de bî. La hetanî nika heme nuşteyê embazanê ma yê zindanî sey destnuşte yenê. Ez bi xo keye de nuşteyanê înan komputere de newe ra nusena.

No karêko hende rehet nîyo. Zehmetîya xo na ya ke ez nêeşkena nuşteyê tayê embazan biwanî, fehm nêbenê. Homa esto, nuşteyê Muradî ne tede, Murad eynen sey mircanan rêz keno. La yê bînî, heme nêbê zî, zafê xo wina kaxite ser o hurdîlek çiz-viz kenê û şawenê. Nêvanê gelo kes eşkeno biwano yan ney?

Yeno vîrê mi, mi yew hîkayeya Huseyînî ke hîrê-çar rîpelî bî, hewteyêk de ancax deşîfre kerdbî. La dima mi rê yew mektube nuşta, hêrs bîyo ke çira çend çekuyê ey şaş nusîyayê. Tabî, mi fehm nêkerdê yan zî mi şaş fehm kerdî, coka şaş vejîyayê! Mi yew cumle belkî vîst rey tekrar-tekrar wendêne. Esas çend rey mi fek ci ra verada. La heyfê mi pê ame.

O mîyan de mi yew mektube ey rê şawite ke wa destnuştişê xo bineyna fesîh binuso ke ez fehm bikî. Mi merdimanê ey rê zî xebere şawite. Ez nêzana mektuba mi kewta dest yan ney. Labelê Huseyînî nuştişê xo nêbedilna. Fekê dewa xo de wina hurdî-hurdî çiz-viz keno û şaweno. Nika ez vana qey yew-di nuşteyê ey ha mi het, ez nêeşkena biwanî. Mi xebere şawite, mi va, eke fesîh, akerde nênuseno, wa zehmet nêkero, nuşteyanê xo nêşawo. Çunke wina mi het manenê. Ez zaf ezabê wijdanî ancena.

Ez hêvîdar a, rojêk verê roje peyê beran ra, o tengane ra vejîyê. La meselaya nuştişî de ganî ma her kes herinda xo ra xeyret bikîn.*

_______________

* Newepel, Rojnameyo kulturî yo 15 roje, Hûmare 28, Dîyarbekir 01-15 gulane 2012, r. 2

Na xebere 1365 rey wanîyaya
No nuşte hema şîrove nêbîyo.