zazaki.net
29 Adare 2024 Îne
Girdîya Karakteran : 12 Punto 14 Punto 16 Punto 18 Punto
10 Êlule 2011 Şeme 19:26

Neslo Vînbîyaye

Bedrîye Topaç

Roj şono awan

Yew eşq qedîno

Neslo vînbîyaye zêdîno

Birayê zerrî şono

Ez sereyê xo nana sêneye şarê xo ser û bermena.

* * *

Teber de boya bêoxirîye esta. Mîyandemendîş kewto leşa yew cinîke û xo rê seydê neweyî dima geyrena.

Hewrê sîyayî dejî anê vîre merdîmîye. Teyrî bêzerrî asmenî terk kenê.

Şewe tarî ya. Şewe bêveng a. Şewe hewn der a. Xid şono. Neslê Xidî wextên de vîndî bîyo. Xid sukij nîyo, Xid dewij nîyo. Xid merdîmîye ra heredîyayo. Zereyê Xidî de çekdarê cuye mirenê. Bedenê Xidî çin o, dest û lingê Xidî çin ê. Çimê Xidî, Xidî ra heredîyayê û Xid dinyaya tarîye de mendo. Serê sereyê Xidî de asmêno kewe çin o, binê linganê ey de hardo sîya çin o.

Koyê zerrîya Xidî rijîyayê, adirê zerrîya Xidî şîyo we. Ziwanê Xidî sey ey wextên de axme bîyo. Heqî vengê ey nêhesnayo. Xid bêwayîr mendo. Vîyarteyê Xidî Xid xo vîr ra kerdo, ameyeyê Xidî Xidî nas nêkeno.

Şewe tarî ya. Şewe bêveng a. Şewe hewn der a. Xid şono. Zerrîya Xidî sey velgê huşkî permeluyaya ra. Lay û laserê Munzurî çimanê ê şaristanî de ziwa bîyo. Huyayîşê Xidî welatên de vila bîyo. Porê Xidî şewe de bîyo sipî. Camerdîya Xidî mîyanê adiran de veyşaya. Xid raştîye rê bermeno. Xid rindîye rê bermeno. Xid vînbîyayîye rê bermeno. Xidî hêrsê xo çarnayo xo û xo weno.

Xido meşo. Seba ma sewbîna dinya çin a. Keşî nêdîyo la na zerrî dî ke Heq esto. Rojê, to û ziwanê to û neslê to yê vînbîyayî ano vîre xo. Xido meşo. Teyrî seba neslê vînbîyayî peyser yenê zerrîya to. Xido meşo, asmêno tarî oncî sey awe beno zelal. Xido meşo, mîyanê hende zuran de ti rastî ya.

Xido meşo, bê ronîşîmê û seba neslê vînbîyayî pîya Munzurê çimanê xo raverdîme…

Na xebere 3290 rey wanîyaya
No nuşte hema şîrove nêbîyo.