Musabeqaya Hîkayeyan a Ehmedê Xasî

-Meymanê qedirberzî, şima bi xêr ameyê, sere û çimanê ma ser ameyê!

(Şeq! Şeq! Şeq! Şeeeqqq!...)

-Ma do ewro xelatanê Musabeqaya Hîkayeyan a Ehmedê Xasî bidê. Homa ziwanê ma sitar bikero, şair û nûştoxanê ma raya ey ser o serberz bikero!

(Şeq! Şeq! Şeq! Şeeeqqq!...)

-Heq tala quwet bido qelem û klavyeya înan...

(Şeq! Şeq! Şeq! Şeeeqqq!...)

-Kîtabanê înan bikero bestseller, bikero longseller...

(Şeq! Şeq! Şeq! Şeeeqqq!...)

-Şima hazir ê? Baş o, ez zî hendayê şima bi heyecan a. Ez netîceyî îlan bikerî ke kes meraq ra nêmiro!

(Temaşekerdoxî huyenê...)

-Hîrêyin: Şewket Berzko

(Şeq! Şeq! Şeq! Şeeeqqq!...)

-Diyin: Zerenca Vengweşe

(Şeq! Şeq! Şeq! Şeeeqqq!...)

-Û nûştoxo ke jurîyê ma hîkayeya ci zaf ecibnaya: Letîîîfff Vileçeeewwtt!

(Şeq! Şeq! Şeq! Şeeeqqq!...)

-Di tenî zî mansiyonî estê:

-O yewin: Mistefa Bêwayir

(Şeq! Şeq! Şeq! Şeeeqqq!...)

-Û diyine: Gulêêêê Gulistaniiijjj!

(Şeq! Şeq! Şeq! Şeeeqqq!...)

-Nika Seydayê Xasî bi xwu do bêro qisey bikero. Seydayê mi kerem bike...

(Şeq! Şeq! Şeq! Şeeeqqq!...)

-Şima pêro xêr ameyê, çimanê mi ser ameyê...

(Şeq! Şeq! Şeq! Şeeeqqq!...)

-Mi eserê enê nûştoxanê ma wendî, keyeyê hemîne awan bo.

(Şeq! Şeq! Şeq! Şeeeqqq!...)

-La verê ke ma xelatan bidê, ma do înan îmtihan bikerê. Hela enê xelatanê ma heq kenê nêkenê...

Pêro temaşekarî şaş mendî. Her kesî ewnîya yewbînî re, hemîne eynî çi persa: Îmtihano peyîn çi yo? Seydayê Xasî dewam kerd:

-Ma tutî û warza û birarzayê nûştoxanê ma zî dawet kerdê, ardê tiya. Nika heme do yew bi yew bêrê sehneyî ser. Nûştoxê ma do înan rê bi ziwanê ma behsê hîkayeya xwu bikerê. Eke tutan hîkayeyê înan fam kerde, ma do xelatan bidê...

Merdimê ke salone de bî pêrune heyret kerd, va “Aaaaaa!...” La seydayê Xasî zey zanayan, zey aliman tebesum kerd û winî bi sempatî ewnîya temaşekaran ra. Pêşkêşkerdoxî dewam kerd:

-Ma xelatan nameyê Seydayî ser o danê. Coka o senî vajo, ma winî kenê. De kerem bikerê…

Nuştoxan ra ê ke tutê ci estê tutê xwu, êyê ke tutê ci çin ê zî warza û birarzayê xwu girewtî û vejîyayî sehne. Çend nûştoxan bi Kirdî dest pê kerd, tayê çî vatî la tuan çiyêk fam nêkerd. Zey qiseykerdişê xwu yê keyeyî bi Japonkî persî persayî. Înan ewnîya ke tutî fam nêkenê, nûştoxan mecbûr tada ziwanê Japonan ser. Gama ke înan tada, Seydayî vat "Nê!"

Peynîya programî de Seydayî xelate tenya da di nûştoxan...