Murîyêra Ap Husî

Ap Husê Keyê Hesan zimistanî rezê xo yê Kendalê Zinaran rot da Qubatê Keyê Deqan, pereyê xo girewtîy.

Orteyê rezê Kendalê Zinaran de murîyêrêka girde estbîy. Murîyê na dare maluteyî bîy, rew deresayêne. Zaf weşî bîy, zaf bitamî bî. Kamî na dare ra yew murî biwerdê, caran tamê aye xo vîrî ra nêkerdê.

Wisarî Qubat şi teli vet, dorê rezê xo sênc kerd. Rezê xo birna, pişt. Wextê kendişî, rezê xo heme kend û pabeyê deresayîşê murî û engure vindert.

Serê aşma tebaxe de murîyê a dare daresayêne. Qubat rojêk verşanêk werişt şi mîyanê rezî ke murîyanê deresayan arêdo la ewnîya ke çi bivîno! Eke Ap Husê ma ha binê murîyêre de, murîyan weşaneno:

- Selamuneleykum!

- Eleykumselam!

Qubat vano:

- Ap Hus, ti se kenî? To xo şaş kerdo! Qey ti murîyanê mi benî?    

Ap Hus vano:

- Ney! Mi xo şaş nêkerdo. Dara min a.

Qubat vano:

- To rez nêrot nêda mi? Şahidê ma estê!...

Ap Hus qet moralê xo nêxeripneno. Vano:

- Belê. Rast a. Mi rez rot da to. La ma behsê murîyêre nêkerdo. Bêre mi rê sond biwane, eke ma nameyê murîyêre girewto xo fek, heqê to esto!

Yewbînan benê û anê. La Ap Hus yê xo ra nêno war.

Roja bîne şefeqêk rew werzenê şinê keyê melayî. Danê ber ro. Melayî zî nimacê serê sibayî kerdo, şîyo kewto cile ke biney hewn ra şiro. Axir melayî hewn ra weriznenê. Mela bi cilanê rakewtişî, yeno hewş. Kincê şewe ke melayî ra yê, cêr ra yew pîjema û cor ra zî yew atlêto qol o. Qubat mesela qisey keno. Dima Ap Hus mesela qisey keno. Mela goreyê şerîetî ra Ap Husî neheq keno. Vano:

- Ap Hus, eke murîyêre mîyanê rezî de ya û to zî rez roto, pereyê xo girewtê, êdî heqê to murîyêre de nêmendo.

Labelê roja bîne Qubat gama ke şino mîyanê rezî, ewnêno ke Ap Hus ancîna ha binê dare de murîyan arêdano. Qubat vano:

- Ap Hus! Homa to ra razî! Qey to nêdî melayî se va?!

Seke tu çîyêk nêbîyo, Ap Husê ma vano:         

- Melayo ke pîjemeyê bajarîyan û atlêto qolik piradaye bo, şerîetê ey betal o!