zazaki.net
30 Nîsane 2017 Yewşeme
Girdîya Karakteran : 12 Punto 14 Punto 16 Punto 18 Punto
15 Oktobre 2015 Panşeme 21:48

MUHENDISO ALMAN Û KINKOR

Ehmedê Dirihî

Serr 1977, wesar o, her cayê Kurdistanî de vaşî bîyî berz û vilan akerdo, kê qayîl î teber a bigeyrî, vêcîyê koyan ser. Ez ha fabrîkaya şekerî yê Erdîşa Wanî de xebitiyena. 

O mehel yew muhendisê zîretî yo alman zî ma wa xebitîyên. Almanê ma pênîro vaşin yê Wanî werdo, zaf weşê ci şîyo. Û nata weta sinasîyan ra persayo ke, senî beşko xwu biresno nê vaşî bivîno û bisinasno. 

Şoforê şîrketî ci ra vano, keynayî wesaran koyan ra nê vaşî arêdanî. Eke ma raşt ameyî, ma şînî înan het û ez no vaş dana tu sinasnayîş. Zaf nişino, rojek hêna hê şinî hetê bajarê Wanî ya. Şofor hinde vîneno ke qefleyê keynayan nîyayo pêra û hê doşê koyî ser o, vaşê pênîrî danê arî. 

Şofor senî ke muhendîsî pê hesneno, o vano pîkab vindarni. Şofor ereba vindarneno, muhendis tira yeno war û lezabez hetê keynayan a gaman nano pîyera. Şofor hetanî vernî û peynîyê pîkabî de lewhayan nano ro ke ereba edelnaya, almanî ma beno nizdê keynayan. 

Keynayî ewnîyenî ke yew camêrd bi lez û bez hetê yin a ho vazdeno yeno. Ê zî lingan darenî we, çend ke înan ra ame vazdenî. Corê înan de zî camêrdî dewe bîbîyê, ê zî vînenî ke yew camêrd kewto keynayan dima, keynayî vazdenî, o ho dima.

Zaf nişino, camêrdî dewe xwu senacêr ser veradanî û vernîyê muhendîsê ma genî. Erzenî lepatan ver, paskulûn danî piro…

Hetan şofor reseno, fek û pirnikan şiknenî. Şofor bi kurmancî ya mesela dano fehmkerdiş, la gure gure ra vîyarto û merdimî mi mirdê xwu darb werdo.

Dewicî şoforî zî şeqeznenî û tira vanî, "Tu çira no merdim veradayo keynayanê ma ser. Heqê tu zî kuyayîş bi, la ti ma ra yî, na rey ma ti efû kerdî."

Muhendîs kuweno layk û vano, "Mi ehendêy lapat û paskulê şima werdî, qe nê ez bivînî no çi vaş o, şima hê danê arî?" 

Keynayî pêşî xwu ra tay vaş vecenî û mojnenî ci, o hîn pê zano ke hê vaşê bi latînî nameyê ci "Ferula" û bi kirdkî "kinkor" yan "heliz" danî arî û kenî mîyanê pênirî.

Na xebere 4849 rey wanîyaya
ŞÎROVEYÎ
Heliz
MŮHAMMED EMIN KAÇAN
Heliz yan kinkor ra mintiqayê ma (Mîyanê Licê, Pasûr û Dara Hênî) de vanê 'kelekurr'. La deşte de çinî yo zozananê ma de esto. La vaşêko/tarêko taluke yo. Dor dorî heywanê ma wenê û pê jahrîye kewenê. Yanê heywanî kelekurrî wenê û pê bahjîyenê û mirenê. Feqet şima penîro ke fotograf de dayo kelekurr ra ney sîrê yawanî ra ameyo viraştiş. Sîrê yawanî ra kurmancî vanê sîrik. Xwura kurmancî nê penîrî ra vanê sîrik. Sîro yawanî zî sey kelekurrî zozanan de la tenî mergan de yeno. Feqet zozanan de çeşîdêgo bîn zî sîro yawanî esto. Mergan de ney herra sista ziwa de yeno. Tehmê ey zaf weş o. Bi hurmet...
15 Oktobre 2015 Panşeme 23:41
Muhendiso Alman û Kinkor
Ehmedê Dirihî
Tu weş ardo ci, Roşan. Resimê kinkorî û pênîrê vaşî yewbînan weşêr î. Homa kemaney tu nêdo ma. Destê tu tern bî !
15 Oktobre 2015 Panşeme 22:18