Meymanê Çimanê Mi

Vanê ke dormê ma de yew dinya esta. Sey ma a kî qet nêvindena, ma rê bermena. Merg esto. Bê îman û bê hêş eşqî dima fetilîno. Eşqê cuye çimê ey kerdê kor. Heskerdene esta, gulî estê, gulîstanî estê. Zîne Memî ra zaf hes kerdo…

Mi rê çi!

Emşo yew waştîyo koçer çimanê mi de meyman o. Wa emşo pepugê bêmiradî mi rê zewtan bidê, adirî bê kile biveşê. Miz û duman koyan bicêro. Çî nêbeno. Ez na şewe herra waştî de tena yew pela huşk a. Kamcîn vayî mi resnenê daristanê zergunî ez êdî teyna înan pawena çimanê waştî de.

Vanê ke xemgînîye ra dima şabîyayîş esto. Çeleyê zimistanan ra dima wisarî yenê. Her surgunî de yew cuye bena weye. Pêro hervan de haştîye dirbetan cêna. Şaîrî xirabîye ra ney, eşqê xezalan ra benê saydkar.

Mi rê çi!

Wisaran ra dûrî de sêneyê mi de eşq viloşîno ro. Wa emşo şaristan hewn de biveyşo, mîlçikî koçê mewsîman xo vîr ra bikerê. Veyvekê neweyî porê xo biruçkinê. Çî nêbeno. Ez na şewe virarîya waştî de tena yew dilapa ya. Kamcîn şilî ke mi benê resnenê behranê keweyan ez înan pawena lewanê waştî de.

Zanan! Xelasê na sewda çin o.

No şabîyayîş leteyê merg o.

No şabîyayîş remayox o.

Giran o, dejneno.

Mi rê çi!

Waştîyo koçer! Wa emşo şaristanî ser o tena zurayîşê vergan berz bibo. Wa behrî hît bimanê. Ti tena zerrîya xo ya koçere çimanê mi de rawereşne. Çimê ma tena na şewe wa seba yewbînî biciwîyê. Ma çimanê yewbîn de weş bîme. Wa hewrî seba ma bireqîyê mezgê merdimîye de. Wa hard û asmên eşq ra bilerzo. Çekuyê ma emşo bindestîye ra bixeleşîyê û seba ma sereyê xo wedarê. Wa şerm kor bibo. Wa awirê ma bêvengîye bidirnê. Tena wa xirabîye bişermayo. Bişermayo ke rîyê hardî de tu kes aye ra nîya hes nêkerdo. Bişermayo ke çolê dinya de hîna laşerê eşqan herekînê. Wa çekdarê qefelîyayeyî eşqê ma ra qewete bicêrê. Wa îsyanî bivejîyê, remayîşê şewan biqedîyo. Wa şewdir bixerepîyo, vileçewt bimano. Wa ma ra bideredîyo…

Waştîyo koçer! Ti kî vînena?

Estareyî yew bi yew rijînê. Ma çiman ra seveknenê. Asmên tarî de maneno. Lulîkê adirî ma rê bi vengode weş deyîran vanê. Zerrîya şewe êdî destanê ma der a. Goş bide! Bihesne! Tamê şewlê aşme leşa to de rindek o.

Axx! Waştîyo koçer, ez bi nalayîş dejanê to ra cuye şimena. Vengê to lewanê mi ra rişîno. Boya koyan û xemgînîya rayîran vengê to de mi oncena virarîya xo. Şilîya to varaena asmênê çimanê mi ra. Bermayîş çi weş o hermeyê to de. Qesey kerdena zerrîyan çi weş a. Veyşayîş!...

Her lewê to lewanê mi de beno îsyan. Wa no îsyan meqedîyo. Wa no şabîyayîş fekê sanikan de bigeyro.*

____________

* No nuşte “Newepel, Rojnameyo kulturî yo 15 roje, Dîyarbekir 16-31 kanûne 2011, r. 5” de weşanîyayo.