zazaki.net
18 Tebaxe 2017 Îne
Girdîya Karakteran : 12 Punto 14 Punto 16 Punto 18 Punto
08 Temmuze 2012 Yewşeme 00:53

Mevinde Bê

Adir Dêrsimij

Mevinde bê rindeka mi

Hewr be, bê welatî ser

Çimanê xo ca mede, rake

Şilî û roştîya ma be

O wext olexî benê ra

Domanê ma raya xo vînenê

Dar û ber ruweno ebi şabîyayîş

Awe bereqîna çemanê ma de

Hêvîya ma ginena hardê Dewreşî ro

Merdimîye axme bena Dêrsim de

Û bena laşer weşîye remena her car o.

 

Têde pîya deyîranê azadîye vanîme

Rindekîye yena nê hardî

Se beno, biskzerda mi, se beno?

Nêbo nêbo, çimanê xo cabiderê

Dêrsim beno cehenem, weşîye heredîna

Tarî ma keno vila, cêno ra xo ver.

 

Omidîya ma, roştîya ma to der a

Ameyeyê ma yê, çimê to yê xorî

Înan de govende oncenîme, benîme çikî

Zerrîya merdimîye kenîme germin

Bê cîgera mi, qeweta xelasîye to der a

Bê rindeka mi, şabîyayîş û xelase bîyarîmê domanan rê

Ameyeyê welatî bixelesnîme

Bê rindeka mi, dest bierze ci

Bê zerrîya mi, bê zerda mi.

 

Vewrêsê vengê Dêrsimî bîme

Xirabîye, bêbextîye biqedênîmê.

Az bidîmê, lawikade derge vajîme.

Nê koyanê ma, vilikanê ma teyna cameverdîme

Bigurîmê seba roja haştîye

Seba şabîyayîşê domananê xo

Mevinde bê vila mi

Hewr be, tîjî be, şilîye be, va be

Hama mevinde bê rindeka mi.

__________

* Na şîîre “Newepel, Rojnameyo kulturî yo 15 roje, Hûmare 27, Dîyarbekir, 16-30 nîsane 2012, r. 8” de weşanîyaya.

Na xebere 1451 rey wanîyaya
No nuşte hema şîrove nêbîyo.