zazaki.net
26 Êlule 2021 Yewşeme
Girdîya Karakteran : 12 Punto 14 Punto 16 Punto 18 Punto
04 Nîsane 2021 Yewşeme 10:17

Meselaya Kekuyî

Enwer Andan

Wextê kengeran bi, ez û dadîya xwu ma teber de hewşî ser o ronişte bî. Vera ma de, virardê mezelan ra vengê teyrêk ameyne. Vengê ci wina bi, "keku keku" dima zî vengêk ti ra vecyaynê, la merdimî hol nêkerdêne, sey nalînîyêka bi hezne ti ra ameyne… Hela, helaa! Seke çiyêk vaco yan hedîseyêko xirab sereyê ci ra vîyarto û xwu rê ey yad bikero. Ez, dadîya xwu ra persaya "Ena tayre çi ya, çi ra îna çîrrena?“ Dadîya mi meseleyê ena teyre wina qisey kerd:

-Damarîyêka zalime yew dewe de bena. Di tutê mêrdeyê ci cenîya verîne ra ke merda estê, yew laj yew zî keyna ya. Ena damerîya xezeb, timî her roj enê mesûman erşawena dawarî dir. Wexto ke dewarî ko ra anê keye, ena hewe çi îşo zor û zehmet ke esto pê înan dana kerdiş. Çi ra ke babî, cîran û dewijî înan ra hes kenê, damarî çimnebarî û hesûdî kena. Waye û bira zî bi sereyo nemir, damarîya înan çi wezîfe dana înan, anê ca. Enê wirdî tutê belengazî zaf helîm û selîm ê. Bi eno exlaqê xwu yê başî kuwenê çima û fekê dewijan. Damarî yew hewî har bena. Vana "Ez çi qeyde sereyê înan bikerê vîndî?"

Zemanê kengeran o. Heqbeyêk binê ci qul kena, dana înan û vana "Şima ma rê eyro gere kengeran biyarê!."

Bira heqbe erzeno xwu kiftî ser, fetelîno waye ra vano "Eyro di wezîfeyê ma estê. Ma kengeran vecenê û şinê dawarî de.

Bi eno qeyde verê xwu danê koyê dewa xwu. Şinê cayê kengeran. Dest bi vetişê kengeran kenê. Waye vana "Keko ma verî cû her yew kengerêk biwerê û badê ma heqbeyê xwu dekerê." Badê werdişê kengerî, dest bi pirkerdişê heqbeyî kenê. Heqbeyê xwu ke pir kenê, êdî wextê şiyayişê keyeyî yeno.

Wexto ke yenê nizdîyê dewe, waye ewnîyena heqbe ra ke veng o. Vana "Heywax keko! Heqbe çi ra veng o?" Kek zî vano "Senî!... " Waye vana "Heqbe to dir bi. Bibo nêbo to kengerî werdê!" Bira vano "Waka min a delale, mi kengerî nêwerdê! Eger ti mi ra bawer nêkena, o çax pîzeyê mi biqeleşne!"

Wayî pîzeyê kekê xwu bi kardî qeleşnena, gama ke ewnîyena ci, yew kenger tenya ho pîzeyê ci de. Waye ax-wax kena, bermi û zarrîya ci şina ezman, poşman bena, la çi feyde, hinî bira tepîya anêgeyreno.

Waye a game wina yew zewte semedê xwu Homayî ra vazena. Vana "Ya Rebî, ti mi bikerê teyrêk, heta ke dinya bibo, ez kekê xwu rê bibermî.”

Vanê waştişê waye qebûl beno. A roje ra heta nika welatê ma de a teyre wina witena:

-Keku, mi nêkişt, kardî kişt, mi nêpişt, dismale pişt û binê kerrî de rona.

Welatê ma de wendişê ena teyre bi eno qeyde, wextê kengeran de dest pê keno, heta ke kengerî biqedîyê dewam keno.

Na xebere 416 rey wanîyaya
No nuşte hema şîrove nêbîyo.