zazaki.net
15 Oktobre 2021 Îne
Girdîya Karakteran : 12 Punto 14 Punto 16 Punto 18 Punto
25 Adare 2021 Panşeme 08:43

Mesajo Verîn o Kurdî

Evdî Hesqera

Astorê xwu verê bewranxaneyî de girêda, kewt zere:

-Ez wazena bewranêk bierşawî welatê xwu.

-Çiman ser. Do şiro kamcin bajar?

-Filan.

-Kamî re?

-Ferq nêkeno. Nameyê eşîra mi binûse, helbet yew vîneno.

 

Wezîfedarê kotirxaneyeyî sereyê xwu kar ra berz kerd, winî bi ecêbmendiş ewnîya ci ra, va:

-Ti Kurd ê?

-E.

-Ti nêşenê Bîzanskî qisey bikerê?

-Eke ez nêeşkena, ti vatişê mi senî fam kenê?

-Yanî ti qisey kenê la Bîzanskîya Konstantînapolîsî nîya.

-Bîzanskî-mîzanskî, ez qisey kena… Xwura ez Rûm nîya, Kurd a. Sûc o?

-Qusirê nîyamede, la ti Bîzanskîya ma xeripnenê… Heheee! “To votoşono mo sonon fohm kono!” Hehe!

-Ez mecbûr nîya ke ziwanê şima zey şima qisey bikerî!

-Ê nezaket? Ê kîbarî?

-Des lejyonê şima ameyî welatê ma, ma zî nezaket xwu vîr ra kerd.

-Sînorê ma…

-Deşt deşta ma ya, ko koyê ma yê, la sînor yê şima yo… Ecêb o.

 

Wezîfedar şi bewran ard:

-Ez çi binûsa?

-Binûs “Ceribnayiş”. “C-e-r-i-b-n-a-y-i-ş”.

-Ê ina çekû bi Bîzanskî nîya?

-Wa bo. Ziwanê ma zî esto.

-Hela-hela! Kam do biwano?

-Hih, o zî meseleyê min o.

-Ti zanê…

-Vindere hele! Bewranêko bîn zî bierşawe, wa garantî bo.

-Baş o. Do şiro eynî ca?

-E.

-Mesajê xwu vace.

-Ceribnayîş 1-2. “C-e-r-i-b-n-a-y-i-ş-1-2”.


Na xebere 482 rey wanîyaya
No nuşte hema şîrove nêbîyo.