zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
16 Oktobre 2019 Çarşeme 19:46

MERHEBAYA NÎMEYÊ ŞEWE

Evdî Hesqera

-Alo! Bira merheba.

-Merheba wayê… Wayê waaayêê, birao biraooo… No çi zilm o, no çi deeerd ooo… Hehe! Ti se kena keyna dîne?

-Ero kam dîn o? Ti zey aşiqan deyîran vanê ha…

-Hehehe! Ê, ti senîn a? Vace hela vace…

-Şikir ez baş a bira. Ti senîn î? Veyv…

-Ez baş a. Wulay ez sey şêran a. Mi vizêr Beloveda Toni Morrison qedêna. Çi weş bî, ya Rebî! Mi vat “Nê reşikan ma ra bolêr dî!” Zerrîya mi veşa wulay. Nûştoxe zî bol ercaye ya ha, cîneke xelata Nobelî heq kerda. Eferim ci rê. Nik…

-Veyva ma senîn a?

-Hea, veyve baş a, baş a. Keyf keyfê ci yo wulay… Keye der a, ronişte ya… Mi ayê rê jî Red Sorghuma Moo Yanî girote. Mi va biwane, bimûse! Merdim nêwaneno, nêmûseno nêbeno… Ey zî…

-Bir…

-Ey zî xelata Nobelî heq kerda. Wulay lazim o merdim verê verkan kitabanê winî kalîteyinan biwano. Mêrdekî weş nûşto, xwu îsbat kerdo û Nobel giroto. Çi yo, ma nê amatoran dest di merdbî! Qeçê ke heyatê xwu de di sey kitabî nêwendê; wendiş çi yo, di sey kitabî nêdîyê mi rê kitab nûsenê, benê nûştox! Hende bes o! Nê şeş mengî yê ke mi terkê ecemîyan kerdo. Mi…

-Keko, e…

-Mi va heta şima Nobel nêgirê ez ne pere dana, ne wextê xwu şima dir xerc kena. Yaw hela biewnî mesela Doris Lessinge The Golden Notebook senî nûşta, nê amatoranê ma sanikê ke ma heme zanê senî herimnenê… Ez zî eşkena şêrî pîrika xwu ra goşdarî bikerî û bêrî binûsî. Dima zî di hezarî pereyê xwu bidî ke yew to rê çap bikero, nameyê to bibo “nuştox”. Tew! Ne fictionek ne intertekstualiteyek… La şar winî yo! Hela biewnî Alice Munro rê! Hateship, Friendship, Courtship, Loveship, Marriage… Namê ci bes o! Ci…

-Yaw ti nînan înglîzkî wanenê?

-Nê, înglîzkîya çi! Mi înglîzkî ver doktora nêkerde. Mi ancax master qed…

-Ê madem ti înglîzkî nêzanê qey çî di çekuyan ra yew înglîzkî vanê!

-E xînta mi, ti hende zî nêzana… Hehee…

-Mehuye… E do çi…

-E, raşt a wulay, halê to halê huyayîşî nîyo. Hooma selametî bido. Ma se kerê, qeder a. Allayî kerd, ma qebûl kenê…

-La laco, halê mi se biyo?

-Ê waya mi ti keye de menda, dara to biya wuşk…

-La!...

-Nê nê, înkar meke. Mi to rê çend tenî dî, ti pê qayîl nêbîya. Wulay camêrdo peyîn BMWyê ci estbî. La çi heyf… Kamcîn camêrdî selam da, to rîyê xwu ci ra tada. Kam zey artîstan bî, ti şîya kewta ey dima. Xwura waya mi zî tam mankene bî! Mankena kilmeke. Anika zî halê to belî yo!

-Aaxx! Mi qey çî telefon…

-Çiyêk nêbeno waya mi, çiyêk nêbeno. Keye de mendiş zî çiyêko xirab nîyo. Tenyabiyene karê fîlozofan o. Winî dewam bike… La nêêê, ti nêwanena. Nirç, bê wendiş ti nêşena bibî fîlozof… Wulay to xêr nêdî… Ti him keye de menda, him zî nêbiya fîlozof…

-La temam, hela, ez do çi bipersî…

-Hi, biperse?

-E. Camêrdî weşêr psîkolojîya camêrdan zanê. Yewî heşt serrî dima mi rê mesaj rişt. Merdim heşt serrî…

-Se vat?

-Va “merheba”.

-Tenya “merheba”?

-E.

-Merhebayêka zuwa?

-“Zuwa”?!

-Saete çend de rişt?

-Ti do saeta ci se bikerê? Ez persê çî kena, ti…

-Eyla xînta mi, eke saete nîmeyê şewe bo; halê ci weş nîyo…

-Yanî senî?

-Camêrdo ke winî wexto berey de mesaj rişeno…

-He?

-Nirç! Halê ci hal nîyo…

-Senî hal nîyo?

-Yanî ez vana beno ke nîyetê ci tayn xirab bo…

-La to senîn “merheba”yêk ra çiyêko xirab vet?!

-Ez zana, ez James Bond a, ez Sherlock Holmes a, ez axa ya, ez paşa ya. Temam?!

-Lo axa, lo paşa… To keyfê mi xeripna… Mi va belkî…

-Belkî melkî çin o! Camêrd yan serxoş biyo, yan zî…

-Yan zî çi?

-Yan zî… yan zî Freud.

-Himm! De haydê xînto!

Çirt!

Na xebere 1836 rey wanîyaya
No nuşte hema şîrove nêbîyo.