zazaki.net
25 Hezîrane 2022 Şeme
Girdîya Karakteran : 12 Punto 14 Punto 16 Punto 18 Punto
01 Kanûne 2021 Çarşeme 10:04

Mehkemekerdiş

Evdî Hesqera

 

Dostê Kosmosî, bohemo verîn ê kirdan Welat Ramînazadî rê

 

Heq tealayî mehşer zereyê otobuse de ronabi la şukir ke ez kursîya teke de biya. Vindergeyêk de hîrê cînî niştî otobuse û helbet zey piyango ameyî verê mi! Seba ke dehwaya cayî nêkerê mi nêewnîya o het ra. La înan ra yewe vat “Çimê aye nêvînenê, cayê xwu bide ci.”

- Paştîya mi fitiq a, ganî ez ronişte bî.

Di camêrdê ke verê mi de bî lez wuriştî, cayê xwu da înan. Cînîya ke nêvînena hema ronişte. Êyê ke mendê, kursîya venge îkramê yewbînî kerd. Dima yew ronişte, a ke mend dest pê kerd:

- Gencê nikayî zî heme nêweş ê, bla bla bla!

Mi ewnîya ke sentaksê aye ra boya Kurdî yena, la mi va herhal ez biya şîzofren. Çimkî cînîyan bi Japonîyêka winî qisey kerdêne ke merdimî vatêne herhal Tokyoyij ê. Her hîrê zî bi pantor bî (xwura normal o). Şeştî serre filan bî; yewe bi bone û eşarp, didi serqot bî û serqotan ra yewe boyaxkerde bî (heme zî normal ê). Engişt û wekê destanê înan bi engîştrane û bazinan pirrî bî (him, japonê sipî yê, him bi otobuse beledîya şinê!). Mi goş nêda vatişanê aye. Xwura telefonê mi cenit.

Gama ke mi telefon dekerd cêbê xwu, înan zî nobeta roniştişî dewr kerde. Cînîya ke newe ronişte, bi Kurmancî mi rê vat:

- Heyf ke ti kurmanc î! Biewnî, hendayê maya to ya…

Surprîîîîîzzzz!

Çiyo ke tewr verî ame mi vîr, fekê mi ra vecîya:

- Ma mi vato bi otobuse şêrê?

Cînîya ke payanî ra bî, embaza xwu ra vat “Temam, çiyêk nêbeno” la aye dewam kerd.

- Hurmet nêmendo…

Dima ewnîya ke ez nêwurzena ageyra Japonîya xwu ser, fek Kurmancî ra verada…

* * *

Nika ez înan dana mehkemaya ziwanê ma:

Celseyo Verîn

Îdîa: Şima kurmanc ê, la çi heyf ke kurmancbiyayişê xwu nimnenê! Tenya wexto ke menfîetê şima tede bibo, şima Kurmancî anê vîrê xwu!

Pawitiş: Ma cînî yê, ma nêeşkenê welatê şarî de bi ziwanê xwu qisey bikerê. Nijadperestanê Japonan êrîşê ma kenê.

Qerar:

* * *

Celseyo Diyin

Îdîa: Heta menfîetê şima tede nêbo şima bi ziwanê xwu qisey nêkenê. Qey?

Pawitiş: Ma Japonê welatê şima yê. Seba ci ma ziwanê şima zanê. Raşt a, tenya wexto ke menfîet tede bibo ma bi ziwanê şima qisey kenê…

Qerar:

* * *

Celseyo Hîrêyin

Îdîa: Waya mi, maya mi… Qey çî şima winî kenê?

Pawitiş:

Qerar:

(Mehkemekerdiş dewam keno…)

Na xebere 1788 rey wanîyaya
No nuşte hema şîrove nêbîyo.