zazaki.net
25 Hezîrane 2021 Îne
Girdîya Karakteran : 12 Punto 14 Punto 16 Punto 18 Punto
06 Gulane 2021 Panşeme 11:18

Lîtreya Sayan Çend Lîra ya?

Evdî Hesqera

Mi waşt ez zî înan dir şirî cor la şef razî nêbi. Winî sert vat "Ma nêşinê veyve ke hende merdimî bêrê! Mêrik Amerîka ra heta tiya ameyo, hende mesref kerdo, ti vanê 'ma kîloyêk dendikan, kolayêka di lître û nîm bigêrê şirê serê koyî, biewnîyê hela senî kişeno'. Ino belgesel nîyo! Ganî şofêr verê erebaya xwu de bimano. Bipawê, heta ma ageyrê!"

Şi. Amerîkayijî tifingê xwu, dûrbîn û çenteyê xwu zî berdê. Şefî vat "Ma do hende goşt senî biyarê, ganî herêk yan bergîrêk zî ma dir bo." Mi dî o wext ewnîya mi ra, tam kerd ke vaco "De ti zî bê" Îs Axa kewt miyan, vat "Bergîrê mi esto." Dewij! Vano eke ez bergîrê xwu biyarî, ê zî do vacê "Ma şeqêk zî bidê to." Nêzano tenya şef nîyo, ey ra girdêr midûr esto, midûrê midûrî esto. Hahoooo! Nê heme verg ê, veyşanî ra mirenê!

Şi. Ez ereba ver de menda. Lacê axayî ame, ez dawet kerda, waşt ez şira keye la mi de keyf nêmendbi. Mi sipas kerd û vat "Ganî şofêr verê erebaya xwu de bimano." Şi çay û tabaxêk biskuvîtî ardî. Mi hûmaritî, des tenî biskuvîtî tede bî, mi bi înan pêsero hîrê çay şimitî. Ooff! Şefî reyna artîstîya xwu kerde, niç niç! Vizêr zî nêverda ez keynaya xwu biberî Amerîkayijî het. Xezala mi vatbi "Qey averşîyayişê ziwanî pratîk baş o” la ez se bikerî... Lacê kutikî nêverda: "Meyman bêhewn o. Xwura nika Anadolu zî pere nêkeno, ganî Fen Lîsesî de biwano..." Ey pexîlo bênamus, lacê to Endustrî Meslek de do bibo ordînaryus?! Çimteng! Tobe tobe...

Acizîyayişî ver mi ewnîya dormareyê xwu ra. Binê tuyêre de qican kay kerdêne:

-Lîtreya sayan çend lîra ya?

-Belaş aaaa...

-Hahahaaa...

 

-Kîloyê lehmecûnan çend lîra yo?

-Belaş aaaa...

-Hahahaaa...

 

-Metreyê şitî çend lîra yo?

-Belaş aaaa...

-Hahahaaa...

 

Kayê înan keyfê mi zî ard, hahahaaa...

Teeeqq! Teeeeqq!

Eştbi. Di rey eşt la îznê ci teyna seba gakovîyek bi. Belgeyê ci îmze ra dima mi berd teslîm kerd, o semed ra ez zana. Hîrê hezarî dolar dabi. Şefî ra vatbi "Goşt seba mi hende muhîm nîyo. Meraqê xwu ra ez welat bi welat geyrena, mi rê zewq o. Sereyê heywanî mi rê bes o, ez do zey yadîgar muhafeze bikerî."

Merdimo ke zewqî ver hende pere xerc keno... Homa zano çend tenî apartmanê ci estê... Şar hende pereyan senî dano arê yaw!

Yenê. Amerîkayij, şef, Îs axa, bergîr, gakovîyo meqtûl... Wa bêre. Destê şefî gunî ra sûr kenê. Axa tede mendo, bargîr gama şi sipî bî la nika zey mangaya sîmental a. Mîster temîz o; kişt la xwu leymin nêkerd, eferim! Mi hema lacê axayî ra vat "Rew tayn naylon, çiyanê zey torbeyê gubreyî yê veng bivîne." Eke biyarê ez do binê bagajî de rakerî, heta ma resayî dayre, hela Heq ma re se vano...

Na xebere 313 rey wanîyaya
No nuşte hema şîrove nêbîyo.