Lêl

Asmên hîra yo, asmên dûrî yo. Erd binê vewra asmênî de hewn dir o. Mîyanê erd û asmênî de merdene bêveng a, merdene bêkes a… Çeleyê zimistanî yo, teber puk o. Dinya goş nayo vengê vayî ser…

*        *        *

Mîyanê koyanê sipîyan de yew deweda qijkeke. Zereyê dewe de yew bano welin û di çim. Şew a. Zereyê banî de ustina banî ra yew lenbo (lamba) dardekerdî yo; lenbo ra boya qazî vejîna û zereyê banî ra bena vila. Lenbo hendê ke zar-zor lîl keno.

Yew cinîka kokime, zereyê cile de nalena. Yew cinîka hewtayserrîye, yew cinîka tenika bejnderge. Leyê aye de zî yew merdimo kokim; o zî nêzdîyê heştay serrî yo. Çewres û heşt serrî yo ke pîya sere nayo yew banişna ser. Cinîke nêweş a, mîyanê cile de giran-giran nalena.

Teber çiqas ke şona beno serd û vengê vayî beno berz. Merdimo kokim cayê xo ra, leyê cinîya xo ra uşt ra şî verê lojine. Adir êdî şîyêne xow ra. Merdimê kokimî di-hîrê kolîyê hurdî û teba yew tezek kerd lete nême eşt serê adirî. Di-hîrê rey adir puf kerd û fişt ta; adirî kile girewte, tanîye zereye banî de bîye vila û roştîya adirî diwarê banî ra reqesîyay.

Merdim verê lojine de serê yew kursî ra nîşt ro. Cêbê êlega xo ra qutîya cixara vete û xo rê yew cixara pîşte. Dime ra adirê lojine ra cixara xo vîşte ta û giran-giran ver kerd ci şimit û fikirîya.

Mîyan ra xeylê wext derbaz nêbîbî, cinîke reyna cile de nalaye û hebê vengêde nerm va:

- Keki, Kekil roştîye, roştîye… Se bîyo? Qe her ca bîyo tingûtarî. Veng û vaj qe birîyo. No çi lêl o? No çi lêl o kes çin o, no çi lêl o nîya serd o?!

Merdim, vileçewt cayê xo ra uşt ra, hesirê çimanê xo kerdî pak. Winî vileçewt ame leyê cinîya xo Gule û aye ra va;

- Gula m’, tenika mi, nazika mi şew a coka kes çin o, şew a coka... Çeleyê zimistanî yo, teber puk o, xezeb o. Zereyê to rehet bo ez leyê to dir o, ez…

Cinîke çimê xo kerdî ya û qaytê zereyê çimanê merdimî kerd. Çimê cinîke bîbî pirê hesîran labelê nêberba. Têna fek ra çend çekuyî vejîyay:

- No çi lêl o nîya tarî yo, nîya serd o ez têde bîyo vîndî. No çi lêl…

Cinîke giran-giran bîna xo ante û nala. Dime ra veng û vaj birrîya. Çiqas ke şî teber ra vengê vayî bî berz. Merdene şemiga çêverî ra ancîye sêneyê cinîke…

Yew pelpelike dormeyê lenbo de pertî wîştêne pa û dormeyê roştîya lenbo  de çerexîyêne. Yew pelpelika sipîye…

Merdim bî çewt lew na çareyê cinîke ra. Porê cinîke ra boya hineyî amêne. Merdimî xo dabî ra na boye; çewres serrî bî ke banişna înan ra na boya hineyî amêne. Merdimî derg-derg qaytê rîyê cinîke kerd û va:

- Heya Gula m’, ti nika mîyanê nê lêlî de bîya vîndî şîya. Ez mendo. Ez bê to nika mîyanê nê xeyalî de se raya xo vejîrî, se bikerî, kam het ra şorî.

Lîhêfo sipî ant cinike ser. Şî leyê lojine di-hîrê kolîyê bînî eştî mîyanê adirî. Dime ra reyna ame leyê cila cinîke û hebê vengê de nerm reyna va:

- Gula m’, tenika mi, nazika mi, şenik mend şodir bo. Na şewe, ez leyê to de sey domanê bêkesî, sey domanê bêmaye û bêpî xo rê rakurî labelê nika ke bî şodir, bî roşn, ti erdê sîyayî rê bena veyva azebe; mi rê manena bêkesîya to.

Zereyê banî ra veng û vaj birîya. Ustina banî ra lenbo winî dardekerde mend û veşa, heyan ke bî şodir.

Heyanî şodir yew pelpelika sipîye dormeyê lenbo de çerexîya û vinete…