zazaki.net
16 Oktobre 2021 Şeme
Girdîya Karakteran : 12 Punto 14 Punto 16 Punto 18 Punto
12 Oktobre 2021 Sêşeme 13:54

Kurdeko Zengîn vs Zengîneko Kurd

Evdî Hesqera

-Merheba embazên. Eno proseyê korona de ma kombiyayişanê xwu winî ekranî ver de, Înternetî ser o dewam kenê. Dinya biya înteraktîf û dijîtal, xirab zî nîyo yanî ma ewnîyenê her ca ra embazî hazir ê. Êêê… Şima zî zanê, ma ge-ge vanê “Kurdê zengînî paştî nêdanê ke nuştoxê ma kitabanê xwu çap bikerê. Eke Kurdê zengînî pere bidê, edebîyatê ma zî aver şi…”

E, Xal Hecî Meheme Seîd zî ame. Ti bi xêr ameyî xalo.

-Xêrî miyan de be… Maşela çewres û çend tenî goşdarî hazir ê…

-Ez bi kilmekî behsê xalî bikerî. Çewlîgê ci yê dewaran esto. Petrolê ci esto. Panc-şeş sey donim hêga, apartmanêk, hîrê tenî traktorî, kamyonek û Mercedesêk… Tokyo de otelêk, Osaka de zî petrolêk û dayreyek. Kurdo tewr zengîn ke ez şinasnena xal Hecî Meheme Seîd o. Heme malê xwu bi xwu qezenc kerdo. Homa ey ra razî bo, qebûl kerd ke bibo meymanê ma.

-To ra zî, şima ra zî.

-Xal Hecî zafê embazanê ke nika goşdarîya ma kenê nuştox ê. Ma vanê edebîyatê ma do bi paştîdayişê zangînanê ma aver şêro. Fikrê to çi yo?

-Yaw… Nika meraqê mi edebîyatî ser çinê yo. Ez raşt vana, sempatîyê mi zî çinê yo. Şima behsê Kurdî kenê la ziwan vinî nêbeno. Melayêk esto, Quran açarna Kurdî ser. Kesî nêgirot, nêwend. Ez seba çi paştî bidî?

-Ziwanê ma yo…

-Yaw nika milet camî de zî terseno ke rehet qisey bikero. Ez heta ewro reyêk zî nêşiya qereqol, nêkewta nezaret. Japonî Japonî Japonî… Yanî do vacê “Eno Kurtçî yo!” Heta ez derdê xwu vacî, heyatê mi şi… Heme şar terseno. Ma ez şaş vana?

-Nê.

-Dinya winî biyo ke çiyo raşt pere nêkeno… Gama ke to vat “Bêre program, ma do qisey bikerî” mi va “Herhal do vacê ti senî biyê zengîn? Ti senî cûyenê?” De baş o… Nika ganî ez şêrî. Bi xatirê şima…

Na xebere 72 rey wanîyaya
No nuşte hema şîrove nêbîyo.