zazaki.net
05 Hezîrane 2020 Îne
Girdîya Karakteran : 12 Punto 14 Punto 16 Punto 18 Punto
13 Gulane 2020 Çarşeme 11:32

KUL

Evdî Hesqera

Midûrî veng da mi, vat bê ma do şirê patronî het. Vizêr şima proje teslîm nêkerd, heqê îhale şîrketê ma dest ra şi. Patron bol hêrs biyo, zaf qeherîyayo. Înşela çiyêk nêro to sere.

Hay loooo! Mi çiyêk nêkerdo ke...

Nê nê, raşt a wulay, heme çî mi kerd. Proje mi nûşt, plan mi viraşt, heme dosyayî xêrê mi ra bî temam, la hero ke warzayê patronî yo, leqleqe ra firsend nêdî bibero teslîm bikero, winî bî…

De ez se bikerî? Heq zano ez nêtersena. Xemê mi zî nîyo. Dîplomaya mi unîversîteyekê karîzmatîk ra ya, zey sewbîna kesan mi bi pereyê pîyê xwu zî nêgirewta. Mi master welatêko bîn di nêkerd la masterê mi zî bi heqkerdiş bi. Inê çend serrî yê ke ez ino pîyase de gurweyena, CVyê mi bi tecrube dekerde yo. Verê nikayî mi cayêko winasî caverda. Eke ez tiya ra zî bivecî hewteyêk dima ez şena reyna gureyêko winasî bivînî. Wulay pere hende zî xemê mi nîyo la mesele "winasî" yo. Heme piyasa biyo "winasî", boka ina rey ez tazmînatê xwu bigîra.

Ma şî. Heş bîbî sûr, wa geber bo, kutik lacê kutikî! Kerd of pof. Ma rê usûlê zengînanê qicê feqîran de vat xêr ame:

- Ino çi gîwerdiş o?

Ey dewam kerd. Dewam kerd...  La mi nêvat eyla bênamus, torpîlê to sereyê to biwero! Ti şiyê xînt û ehmeqê zey xwu ardê, karê înan ez kena. Karê hîrê-çar merdiman min û stajyeran ser o yo. Ma zî însan ê! Ez gurwayiş ver mirena, qinbîdonê bînî zî şimitişê qehwe û fesadî ver. Meaşê înan zî maşella. Qerewaneyê ma meqerne û germî yê, la maseyê înan ra lehmecûnî kêmî nêbenê...

Hezar çiyê winî ameyî fekê mi ver la mi nêvat.

Gama mi hema enê pêro nêvatbî û sereyê xwu berz kerd, mi dî patron zî nenganê xwu temam keno. Dima bî sakîn. Midûrî çend tenî esprî-mesprîyê berbatî, kuşat-muşatê ke hende komîk nîyê kerdî. Ma musade waşt, axurê herê tewr girdî ra vecîyayî.

Di saetî biyo ke ez cayê xwu de ronişte ya û çiyêk nêkena. Mi ino şîrket ra fek veranêda, tazmînatê mi nêşi la nika zî hêrsan ver pîzeyê mi teweno. Mi çiyêk nêvat, la nengê qotikî biyî kul kewtî mi zere.

Na xebere 312 rey wanîyaya
No nuşte hema şîrove nêbîyo.