zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
03 Kanûne 2020 Panşeme 08:57

Koleksîyonê Qapaxê Gazozan

Evdî Hesqera

Mi hîrê tene çay girotî, ez ageyraya embazan het ke, verê înan de yew vinderto, qisey keno. Ma ra davîst serrî girdêr o. Verçimikê ci, eşofmanê ci marka yê. Sereyê ci keçel o, la porê ci yo ke mendo derg kerdo, peynî de girêdayo. Ez şiya resaya înan. Mi qedehê çay derg kerdî dayî embazan, dima xwu çarna ey ke merheba bidî, mi dî bi ecele telefonê xwu vet, da verê goşê xwu:

-Tonyukuk, lacê mi, ti se kenî? Hulagu senîn o? Ey dir lec meke ha lacê mi, birayê to yo...

Winî xwu bi telefon meşgul kerd û rema. Mi ewnîya embazan ra, her di zî zaf aciz bibî:

-Eşnawit ke ma bi Kurdî qisey kenê, ame vat 'Ez jî Kurd a'...

-To çimê ci dî!

-E, eynî zey çimanê bênamûsan bî...

- Va ‘Ez filan unîversîte de mamosta ya, beno ke şima rê çiyek lazim bo...' E, qayîl o ma bixapêno!

Mi fam kerd ke mêrdek bi niyeto xirab ameyo embazan het. Xwu rê ziwan kerdo mane... Herhal vato 'Eke ez vacî ez kurd a, zey înan qisey bikerî, ez eşkena keynan bixapênî...'

Mêrdekî embazê mi zaf aciz kerdbî. Xwura heta ma çay û cixaraya xwu şimite, vapur zî resa îskele.

Ma ameyî war, vecîyayî verê îskele la kesî de keyf nêmendbi. Mi navîgasyonê telefonê xwu de "Gazozxane" nûşt, goreyê vatişanê cineke, ma kewt ray.

Çend sey metreyî dima ma keçelo porderg kerd xwu vîr ra, zey seydwananê ke kewtê pey zerencan û arwêşan, dîyayişê dikanê gazozan ma rê bi meraq. Ma nîm saete tabeleyê dikanî dî, zey heme nankoranê teknolojî nêverda ke cîneka rehbere vatişa xwu biqedêno, bê xatirwaştiş ma programê ci pada. Dima zî bi kelecan ma kewtî zere:

-Merheba! Ino embazê ma koleksîyonê qapaxê gazozan virazeno. Yanî ma qapaxan arêdana...

Verê dezgeyî de xortêk vindertbi. Bi destê xwu goşeyê dikanî îşaret kerd:

-Kerem bikerê...

Ma nezaket, kubarî, elîtbiyayiş û pêro qaydeyê adabê mueşeratî kerdî xwu vîr ra, zey vergan xwu eşt lênê qapaxan ser:

-Ino to dir çin o!

-Aaaawww! Ina marka fabrîkaya xwu rotbi, marketanê girdan de zî çin ê.

-Gazozê bajaranê wirdîyan zî estê! Mûş, Şirnex, Colemêrg...

Mi telefon de fotografê koleksîyonê xwu akerd. Heme goreyê alfabe têver de bî: A. Amed... Awa Zerd... Aqua...

Ma vîst deqayî dima sereyê xwu hewada: hîris û heşt tene qapaxî ma dest de bî. Ma şî verê xortê ke bellî bi wayîrê dikanî yo. Embazan ra yewe vat:

-Hîris û heşt tenî... Deynê ma hende yo?

Xortê ma şerman ra sûr bi:

-Nê, qapax ê... Pereyê çi...

Ma teşekur kerd. Embaza bîne vat:

-Eke winî yo ma zî to ra gazoz bigêrê, ti zî kîra danê...

Na rey ma kewtî fekê dolaban, markayê ke ma de çin ê dima.

Ma karê xwu qedêna, gazozê xwu şimitî la sûrbiyayişê wayirê dikanî mi vîr de bi. Mi texmîn kerd ke o zî kurd o:

-Patron ti ça ra yî?

-Meletî.

-Ti kurd î?

-E.

-Mi camêrdîya to ra fam kerdbi...

-Estexfîrulah...

Ma tayn qisey kerd. Mesela ameye ziwanî ser. Mi persa:

-Ti Kurdî zanê?

-Nê. La may û pîyê mi zanê.

Wextê veciyayişî mi bi Kurdî ci ra xatir waşt:

-De bi xatirê to...

Zeke çiyek biyaro xwu vîr, pawit. Dima giran-giran vat:

-O x i r  b o.

Ma dîyayişê qapaxan ra bolêr keyfweş bibî la keyfê patronî ma ra zafêr bî:

-Aaa! Ez zî zana!

 

Na xebere 1026 rey wanîyaya
ŞÎROVEYÎ
Kendal
Kendal Kendal
Zaf weş bi keko, mi bi zewq wend. Destê to tern bê
07 Kanûne 2020 Dişeme 16:24