Kilama Hecî Wisifê Nêribî

Ma ina kilame fekê dengbêj Hecî Şukrî ra arêda. Hecî Şukrî 61 serre yo. Dewa Pîranî Pilişkîyon de ameyo dinya, eynî dewe de ciwîyeno.

Dengbêj Hecî Şukrî meseleya ke kilame de yena vatişî ser o winî qisey kerd: “Mêrik şi keyedê vistewrondê xwu. Wayirê di cenîyan bi. Misafirey de çend rocî mend. 1985 di, aşma sibatî bî. Ageyray omeyî, tofan û tîpî day piro. Wur di cenîyan a, laconê xwu ya, cenî hemîla bena, nêşena rayir şiro. Binê vewri di mendî xeniqyayî. Peyê Hênî ra qaymê Şeynon. Şeynon ra şiyo qayme, Koyê Barton di yew aşmi bindê vewr di mendî…

Ina kilami, keynay ey ser o bermaya vata, miletê ma kerda kilam.”

* * *

Hewar dayê, hewar dayê, hewar bawo

Hewar dayê, hewar dayê, hewar bawo

Gunekê gondê mi tenya wo, hewar dayê, hewar bawo!...

Payiz derey o, zimiston o; zimiston varito giron o

Bawoy mi warê di cenyon o

Zomay dewdê xwun û dewda Aldunon o

Bawoy mi vonû xatirbê şima cimatî ez ha şonû vistewrono

Hewar dayê, hewar dayê, hewar dayê, hewar bawo

Gunekê gonê mi tenya wo!…

Bawoy mi ko hefteyêk kêy vistewron di mano

Bawoy mi dekewno miyondê hewnan û teşqelono

Bawoy mi hewnê xwu venayne, hewar dayê, hewar bawo

Hewar dayê, hewar bawo!…

Bawoy mi hewnê xwu venayne, qirfê bawondê mi ricaynê

Cematê bawodê mi raşiyaynê

Bawoy mi vengêk venga daday ma Zeyne daynê

Vatê “Zeynê xwu hazir ke, ma şêrî keyewo

Mi emşo keyê ma di dî yew teşqelewo

Key ma yew keyo giron o; key feqîron û fiqaron o

Key gelenon û gîdenon o; key keynandê resayon o

Wa key ma bêwar nêmano.”

Hewar dayê, hewar bawo!....

Bawoy mi xatirê xwu vistewron ra wazeno

Yeno verdê awda çeman o

Koy Barton mij û dûman o

Koy corî venday kodê cêrî dono

Koy cêrî venday kodê corî dono

Bawodê mi rê yew qeyume ano

Hewar dayê, hewar bawo, hewar dayê, hewar bawo!...

Bawoy mi dekweno miyondê Koydê Bartono

Vewr û varit vorena, va û verêk ver pê dono

Bawoy mi şaş keno rarê Elyano

Verê xwu tadono rardê Goza Giron o

Hewar dayê, hewar bawo, gunekê gonê mi tenya wo!...

Bawoy mi ewnêno ke mara şinik a, bar giran o, ko rar ra mano

Bawoy mi mara şiniki canêverdano

Vengêk veyda Şelday Heyda dono

Va û varik ver pê dono çew nêzano bawoy mi se vano

Hewar dayê, hewar dayê, hewar dayê, hewar bawo!...

Vowri varayni, va û vavêrikî ver pê daynê

Ehmedo bira, Ehmedo şinik serey xwu baway mi ver di ronaynê

Baway mi xwu cêbo ra geyranê, defterê deynon vecyaynê

Baway mi adir defterdê deynon ra naynê

Va û vavêrikî ver pê daynê, adirê bawodê mi mernaynê

Dinyadê bawodê mi qednaynê

Hewar dayê, hewar bawo, gunekê gonê mi tenya wo!...

Vewri day û bawonê mi ser o varaynê varaynê nêceyaynê

Nêceyaynê day û bawodê mi teber ra nasaynê

Aşmê day û bawodê mi bindê vewr di qedyaynê

Xeberê bawondê mi dew û dinya ra geyraynê

Hewar dayê, hewar bawo, hewar dayê, hewar bawo

Xeberê bawondê mi Nêribon ra geyraynê

Nêrib eşîra giron o, mela oparlo di vendono

Vonû “Gelî eşîrê Nêribicano, bêrê ma şêrê eno kodê Bartono

Ma veynê Hecî Wisif û cenîdê xwu ko ko ra manê

Hewar dayê, hewar bawo!...

Lê Nêrib eşîra giron o, xwu ver gêno Koy Bartono

Veynenê tirmê bawondê min û wur di cenyano

Hewar dayê, hewar bawo, hewar dayê, hewar bawo

Gunekê gonê mi tenya wo!…

Vonê yew veng yeno, yew veng dono

Vonê Hecî Wesmon hanyo veng dono

Vonû “Gelî eşîrday Şeynono,

De bêrê ma dîyû tirmê Hecî Wisifî û wir di cenyono

Bêrê ma tirmanê xwu berî mezelono

Hewar dayê, hewar bawo, gunekê gonê mi tenya wo…

________
Seba goşdarîkerdişî bitikne >>>