zazaki.net
21 Oktobre 2019 Dişeme
Girdîya Karakteran : 12 Punto 14 Punto 16 Punto 18 Punto
24 Gulane 2019 Îne 16:17

KILAMA "BIRAWO"

Arêkerdox: Evdî Hesqera

Mi ina kilame fekê dengbêj Sêrdînî ra arêda. Dengbêj Sêrdîn Kanîreş ra, dewa Baxçe ra yo. Lajê hecî Mehyedînî yo. Eslê ci Xeylanij o. 1951 de ameyo dinya.

Nameyê merdimanê ke kilame de behsê înan beno, ey kerdê têmîyan ra. Verî va “Nameyê her di embazan zî Mehemed o.” Dima vat “Yew Mehemed, yew Hesen o.” Dima ma ci ra persa, vat “Her di zî Hesen bî.” Ma zî zey vatişî ci nûşt.

Va “Huerd mirdîm, namê huerdon zî Mehemed o. Huerd mirdîm piya şî esker. Yow bêlûg id huerd îz bî çawîş. Bî çawîş, eskerîya xwu qedîna ûmê dew… Her yow, yow eşîr ra yo. Yow Xeylanij, yow Qasimij bi. Huerd jî eşîrê pîl ê, Pali di. Dêmek terêf Homê da… Se kerd se, bî dişminê yowbîn. Qey hec Mehemedî dawo piro, Memed çawîş birê xwu kişt… Ombazî yi wo. Huerd jî Memed çawîş î. Da piro kişt. Waxti aw kişyawo, cinîy yê hemle ya. Hemlê yê lac bi. Vîst serr dima… Vîst serr dima, cinîy yê welidyena, vîst serr dima lajek ben pîl. Lajek ben pîl, lajek vûn ‘Bavî mi hew ça? Bavî mi kûm?’ Ca vûn… Vûn ‘Welle bavî to filan kes biyû, filan kês zî do piro bavî to kişt.’ O wext lajek vonû ‘Wulay ez întiqam bavî xwu gen.’ Nat wet vûn ‘Ma ûmey werê falan bêvan…’ Von ‘Nîye, kesînlîkle ez întiqam bavî xwu nîgîr se ez laj ci nîya.’ Lajek sîlêh xwu dûn mîndê xwu ra… Dabançê bû. Donû mîndyê xwu ra û yen Bîngol. Ma Bîngol a vatî Çowlîg. Yen Çowlîg, nat wet persen, nêşinasneno kûm o. Perseno… Mi ra, to ra, ay ra perseno Mehmed çawîş kûm o? Yow mojneno, wuelay vûn ‘In o.’ Tabî nêvûno ‘Ez yê kişea.’ Ci paweno, ino ûmo çarşî, gêren heta şan. Ino zî yê dim gêreno. Şanî re şino gi şîr kîyi. Bon yê diqat o. Qato cêrin ra şino diyar, nêrdiwan ro… Ino pê ra vendûn ci. Vendûn ci, vonû ‘Memed çawîş!’ O pê xwu di ûwnîyeno. Wext pê xwu di ûwnyen, ini non pa… Ini non pa, cor di, nêrdiwan ro, kewt war.

 

Birawo birawo birawo

Birawo birawo birawo

Zerr û cîger mi biray mi r’ helyawo, birawo

Birawo birawo birawo, way…

 

Erê mi va wisar diyen daron pel kerd awo, birawo

Weley mi va wisar diyen, daron pel kerd awo, birawo

Weley xebêr mêrg biray mi diyawo, birawo

Ax birawo birawo birawo

Zerr û cîger mi biray mi r’ helyawo, birawo way…

 

Erê mi va în dewan dewê ma wo, monîkyeno birawo

Wueley mi va în dewan dewê ma wo, monîkyeno birawo

Eza kuer xwu r’ ruenişta bin mangano, birawo

Wweley xeber omîya von Hesen çawîş kişto, kerdo miyûno, birawo

Ax birawo birawo birawo

Zerr û cîger mi biray mi r’ helyawo, birawo way…

 

Wweley mi va debançe qarşî tifîng mûnen zê çwa yo, birawo

Erê wweley mi va debançe qarşî tifîng mûnen zê çwa yo, birawo

Ax birawo birawo birawo

Zerr û cîger mi biray mi r’ helyawo, birawo way…

 

Eza kuer xwu r’ ruenişta bîn mangano, birawo

Wweley xeber ûmîya von Hesen çawîş kişto, kerdo miyûnû, birawo

Ax birawo birawo birawo

Zerr û cîger mi biray mi r’ helyawo, birawo way…

Ê birawo birawo birawo

Zerr û cîger mi biray mi r’ helyawo, birawo way…

 

Resim: Melissa Adams

Na xebere 750 rey wanîyaya
No nuşte hema şîrove nêbîyo.