zazaki.net
19 Nîsane 2021 Dişeme
Girdîya Karakteran : 12 Punto 14 Punto 16 Punto 18 Punto
04 Nîsane 2021 Yewşeme 10:20

Keyfê Korona

Evdî Hesqera

Kurmancê ma vanê “Mirina bi êlê re dawet e!” Ina nêweşî de pêroyê dinya biyî nêweş, ez zî biya. La mi ena nêweşî zey veyveyî vîyarna.

Mi xwu hazir kerdbi. Senî ke netîceyê testê mi pozîtîf vecîya, hema mi xwu eşt keye. Heyate de, verê televîzyonî de qenepeyêk esta. Aha! Cînîya mi va “Şo odaya bîne” la nê, eke ez bimirî zî, ez do verê Netflix de bimirî…

Zereyê sîstemî zey vatişê mi bi. Mesela, mi awa xwu bi tasan nê, dîrekt bi surahî şimitêne. Poncikê mi binê masa de, zereyê maskeya mi de bî. Wa sereyê WHO harakîrî biko! Cîps û kola ameyî, diyet û squat şi. Ge-ge zî mi zey Leon The Professionalî şit bi qutîya ci şimit, afîyet bo mi rê. Mi des rocê karantîna de betanîya xwu reyêk zî raşt nêkerde, ox!

Şewêk cînîya mi va “Termosêk çay û qedeh verê keyberê to der ê. Kursîyê xwu bîare teber, ma do piya çay bişimê.” A hetêk de, ez heto bîn de, ma antre de çay şimite, suhbet kerd. La wextê bînî bi temamî mi warê Hesenî de, waro azad de vîyarnayî…

Ez nêzana roca çendine bî cînîya mi, veyveka newîye odaya xwu ra telefonê mi kerd. Ecêb o! Mi akerd:

-Xêr o?

-Vengê to yeno, ti telefon de her kesî dir qisey kenê.

-Embazî telefon kenê, eşnawito ke ez nêweş a…

-Ez zî embaza to ya. Telefon de mi dir zî qisey bike…

-Telefon de? Ma eynî keyê der ê?

-E, ti telefon de her kesî dir qisey kenê, mi rê zî bike…

-Ti qayil a ina nêweşî mi rê bikerê jehr?!

Na xebere 120 rey wanîyaya
No nuşte hema şîrove nêbîyo.