zazaki.net
07 Oktobre 2022 Îne
Girdîya Karakteran : 12 Punto 14 Punto 16 Punto 18 Punto
01 Kanûne 2021 Çarşeme 09:44

Keyeyê Şima de Fîl Esto?

Evdî Hesqera

Seba cînîyeka mina delale…

Ez zana! Cîranê ma fîl keno weye... Wulay vengê ci ame! Serê sibayî ez şibiya tuwalet, mi uca de eşnawit! Pencera zaf berz a, ez nêeşkaya biresî ke rehet biewnî fîlî ra. La belî yo ke yewî qicê xwu rê kudikêk giroto, qey wayirê banî nêverdano merdim heywanan biyaro zere, coka nimitkî keno weye. Wa bo... Wa apartman de bo, ez îlla vînena! Her serê sibayî ez rew wurzena remena tuwalet, pawena ke vengê ci bêro. Mi maya xwu ra zî nêvat, beno ke aye û baba şêrê şîkayet bikerê...

Reyêk ma market ra ageyrayne, mi dî çend tene qicî verê apartmanî der ê. Hema mi xwu destê maya xwu ra xelesna, ez remaya ameya înan het, mi vat "Fîlê şima esto?" la înan fam nêkerd, ewnîyayî yewbînî ra. Maya mi ge-ge vatêne "Ti xeberdayiş de ecele kenê, merdim fam nêkeno." Mi reya diyine winî sakîn persa "Şima fîl kenê weye?" la nê, fina kesî fam nêkerd... Çiyêk nêbeno. Herhal pîyê înan înan ra vato "Şarî ra mevacê ke fîlê ma esto, do bêrê bierzê teber." Dima maya mi resa ma, ez tepişta arda cor.

Ez her serê sibayî şina tuwalet, pawena ke vengê ci bêro. Serrek dima ez do şêrî mektebe. O wext ez do qicanê apartmanê ma bivînî, rehet bipersî. Eke qebûl bikerê ez do şêrî keyeyê înan, fîlî bivînî. La mi dî maya mi vana "Lacek do mekteb de senî bikero, Japonî nêzano. Ez zaf ey ver kewena..." Ez zaf tersaya ke pîyê mi vaco "Wa nêro mekteb" la vat "Ma heme mecbûren mûsayî, wa o zî winî bimûso. Domanê zengînan şinê kreşanê Îngîlîzî, eynî yo." Xêr Alayî baba razî bî, ez do şêrî û qican ra bimûsî hela fîl yê kamî yo. Beno ke destûr bidê ez zî bivînî. O wext do fistiqî lazim bê. Ganî ez enê ra tepiya fistiqanê xwu wedarî, cayêk de nimitkî bidî arê...

Na xebere 2042 rey wanîyaya
No nuşte hema şîrove nêbîyo.