zazaki.net
22 Gulane 2018 Sêşeme
Girdîya Karakteran : 12 Punto 14 Punto 16 Punto 18 Punto
13 Sibate 2018 Sêşeme 17:21

KERREYÊ WAY Û BIRAYÎ

Îdrîs Yazar

Kerreyê Way û Birayî ha dewa Bircik de yê. Bircik dewa Mîyaranî (Arıcak) ya, bi tirkî nameyê aye kerdo "Karakaş". Mintiqaya ke enê kerreyî ha tede yê, bi nameyê "Serê Xendeqî" name bena. Ena mintiqa, rojhelatê Bircikî de manena û dewe ra teqrîben qasê 3 km dûrî ya. Berzîya kerreyan davîst metreyî esta. Kerreyo ke hetê serî de maneno, yê Birayî yo; yê hetê cêrî de zî yê Waye yo. Û Kerreyê Waye, Kerreyê Birayî ra bineyna berzêr o. Sehayo ke enê kerreyî ha tede, teqrîben 300-400 m2 esto. Seba şiyayişê leweyê înan gereka kê Kerreyê Birayî ra şirê. Çimkî yê Waye de cayê tepîştiş û cayê paysernayişî çîn o. La yê Birayî sey paşuran o, kê şînê ê paşuran ra şirê leweyê Kerreyê Birayî. Uca ra zî kê şikênî xwu bierzê serê Kerreyê Waye. Serê înan de menzerayêke zaf rindeke esta.  Enê kerreyî cîya-cîya yê, la cêr ra ha pîya dusnaye yî, orte ra pey, hetê corî ya cîya benê. Û mabeynê înan cayêk de yew metre, cayêk de yew metre û nîm esto.

Eno fotograf mi hetê Çira Serî ra anto. 12.02.2018    

Goreyê efsane, vanê yew waye û yew bira bîyê. Waye û bira rojêk şiwane benê, seba çerênayişî biz û mêşnayê xwu berdê uca. La her di zî kaykerdiş de xecelîyenê û pesê înan beno vîndî. Bira zaf geyreno, waye cayê xwu ra tênêgeyrena. Bira hêrs beno, zewtan dano waye ro, vanê waye cayê xwu de bena kerre. Bira zî dima poşman beno, Homayî rê dua keno, vano “Ya Rebî, mi zî yew bike kerre, ez kîşta waya xwu de bî." Vanê Homa duaya ey qebûl keno, o zî beno yew kerre û dusyeno waya xwu wa, aye ver ro wurzeno.

Eno fotograf zî mi hetê dewe ra anto. 12.02.2018

Hetê vakûrê Kerreyê Birayî de yew qula qickeke esta. Erd ra berzîya ena qule çar metreyî esta. Hetanî serranê 1990an winasî bawerîyêk bîye ke: kê kamî ra hes bikerdêne, kê nameye ey/aye vatêne û hîrê hebî kerrayî kerdêne xwu dest û war ra eştêne ena qule. Eke nê hîrê kerrayan ra yew zî qule de bimendêne, vatêne miradê ma beno, ma eşkenê bizewecîyê. Eke heme hîrê kerrayî zî bikewtêne war, vatêne miradê ma nêbeno, ma nêzewecîyenî.

Qerebegan, 13.02.2018

Na xebere 624 rey wanîyaya
No nuşte hema şîrove nêbîyo.