zazaki.net
24 Oktobre 2021 Yewşeme
Girdîya Karakteran : 12 Punto 14 Punto 16 Punto 18 Punto
11 Temmuze 2021 Yewşeme 09:41

Keçelya

Evdî Hesqera

- Wezîrê ercayeyî, wekîlê parlamentoyê Keçelya! Goş bidê mi! Ma hukmatê xwu rona. Ganî ma nêvinderê, ma pêro şarî bikerê keçel!

(Şeq şeq şeeqq şeeeeeeqqq!...)

- Yew yeno porê ci siya yo, yew yeno porê ci zerd o; sûr o, nerm o, sert o... Merdim esto porê ci zaf o, merdim esto tenya nîmeyê sereyê ci keçel o... Ma do inê ferqan miyanê şarê xwu ra wedarê! Her kes do bibo seypê. Ewro ra pey, ino memleket de heme şar do keçel bo!...

(Şeq şeq şeeqq şeeeeeeqqq!...)

- Ma do porî qedexe bikerê! Kes do bi rengê porê xwu, bi şeklê ci merdimanê bînan ra ciya nêbo! Gama yewo xerîb biewnîyo miletê ma ra, do bivîno ke sereyê heme welatîyanê ma eynî yê! Ma do nêverdê tu kes bi gijika xwu şarê ma parçe bikero!...

(Şeq şeq şeeqq şeeeeeeqqq!...)

- Nika ma do keçelê ke welatanê bînan de cuwîyenê biyare tîya, serewuşkê ke wazenê porê xwu bikerê belayê sereyê ma zî bierşawê ucayan! Ino vatişê mi xwu vîr ra mekerê: Sereyo keçel, sereyo tewr berz o!...

(Şeq şeq şeeqq şeeeeeeqqq!!...)

- Ma do her mehla de, her dewe de keçelxaneyan awan bikerê, pêro qicî do şirê uca xwu derman bikerê. Panc serran de heme do bibê keçel! Kam ke domananê xwu nêerşawo keçelxane, do ceza bigêro, do hepis bibo! May û pîyê înan zî, ma do bi usturayan bikerê keçel. Anarşîst û eşqîyayê ke inê qanûnê ma qebûl nêkerê, do bimirê! Yan sereyê înan, yan porê înan!...

(Şeq şeq şeeqq şeeeeeeqqq!...)

- Fikro tewr baş sereyê keçelî de yo! Werre bi o merdim ke sereyê ci keçel o!!

(Şeq şeq şeeqq şeeeeeeqqq!...)

- Bicuwîyo Keçelya! Bicuwîyo welatê keçelan!...

(Şeq şeq şeeqq şeeeeeeqqq!!!...)

Na xebere 235 rey wanîyaya
No nuşte hema şîrove nêbîyo.