zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
02 Temmuze 2018 Dişeme 13:42

Kamcîn nengî baştir ê?

Roşan Lezgîn

Ap Husê keyê Hesan û lajê xwu keye de roniştê, qalê kar û îşê dewe kenê. Ap Hus vano:

- Lawo şima nêşî rezê xwu nêkend!...

Lajanê ap Husî ra yew vano:

- De bawo ma vernîyê şarî de kenenê, nengan çînenê vanê “Ma wina-wina kerd dadîya înan, biewnîyê, rezê xwu kendo qedênayo.” Ez vana wa dewijî şirê rezê xwu bikenê biqedênê hema ma şinê kenenê…

Lajo bîn vano:

- Bawo, wulay o qayde nîyo. Ma badê şarî bikenê, ancî nengan çînenê vanê “Ma wina-wina kerd dadîya înan, gartalê pîsî, nêeşkenê karê xwu bikerê.”

Lajo qij vano:

- Bawo wulay ma se bikin nêkin, nengî çînîyenê. Xwu rê ronişê…

Welhasil munaqeşe beno derg, dima tadîyeno enê ser ke kamcîn nengî baş ê.

Ap Hus vano:

- Lawên mi, nengê ke merdimî karê xwu kerdo qedênayo ver yenê çînayiş baştir ê. Wexto ke merdim karê xwu keno qedêneno, ê ke nengan çînenê, hesed ra çînenê. La wexto ke merdimî karê xwu nêkerdo, peynîya şarî de mendo, nengê ke o wext merdimî ra yenê çînayiş, ê ke nengan çînenê, xwu merdimî de kenê rehet, keyf gênê. Şima karê xwu tim vernîya şarî de bikerê, wa qet şima ra nengî biçînîyê.

Na xebere 2300 rey wanîyaya
No nuşte hema şîrove nêbîyo.