Kamî Şêrgele Kişto?

Ap Husê Keyê Hesan zemano ke zewicêno, hewteyêk badê vêveyî, keyê vistewran yenê ey û cinîya ey Naca Ase sey vêve û zamayê tezeyî benê zeyî.

Vistirîya Ap Husî Pîra Fate şan de xilike dana dêzike ro. Dêzike dana deneyî ro. Req-req firaqan ra ana. Zîyafet dana…

Roja bîne keyê vistewranê Ap Husî şinê hêgayê awî de kurêkê payîzî çînenî. Ap Hus zî xo qure keno, şino hetê înan. Camêrdî kurêk çînenî, cinî û kênayî zî înan dima şimêlan danê arê. Xala Eyşa baltuza Ap Husî zî a game kênaya xama ya. A zî mîyanê cinîyan de ya.

Eyşe senî ke şimêlê kurêkî wedarena, çira yew merre bin ra nêremeno. Qîştî kewena Eyşe ser, bi ters qîrena. Milet keno hêwirze, her yew cayê ra vano, “Merre, merre!”

Ap Hus sey zamayê neweyî, wazeno palewanîya xo binawno. Sere dano merreyî ser. Çend rey vaşturîya xo çelpneno. La merre sey virsikî çindik dano, derba Ap Husî veng ra şina. Axir peynî de derbe ginena sereyê merreyî ro. Hêgayê çînayeyî de, mîyanê meydanî de lingê ey benê rep, mireno.

Bineyke badê cû, vistirîya Ap Husî paleyan rê areyî ana. Cinîya Ap Husî zî sey vêvika tezîye ameya zeyî la a zî wazena kar de hetê keyê babîyê xo bikero. Çend parçeyê werdî zî aye girewtê û maya xo reyde şinê mîyanê hêgayî. Versîya gozêre de sofre rast kenê. Camêrdî yenê ke nanê xo biwerî, cinî zî şimêlan danê arê. Tam a vîstike de, hîna ke paleyan dest bi werdî nêkerdo, çira çimê vistirîya Ap Husî nêgineno berateyê merreyî ro. Nişka ra qîrena vana:

- Hero kamî tîya no merreyo pîsik mirdar kerdo?

Veng şino miletî. Xo rê binê zimbêlan ra peşmirîyenê la kes vengê xo nêkeno. Çira na qale nêginena Ap Husî ro. Ey rê giran yeno ke vistirîya ey verê cinîya ey û hende miletî de vato, “merreyo pîsik”. Ap Hus, seke forsê ey bişikîyo, pungurîyeno, şino pêser. Qet destê xo derg nêkeno, koçike nêgêno.

Baltuza ey, na Xala Eyşe o wext zî bineyke şeytanike bena. Leze fehm kena. Nusknena maya xo, bi vengêko nizmek vana:

- Da-dayê merreyî çi yo? Ti nêvînena? Şêrgele yo, şêrgele! Zamayê to kişto…

Hiş yeno bi sereyê vistirî. Xo arqilîyena. Hewna qîrena vana:

- Hero kamî no şêrgele tîya kişto?

Hema newe rengê Ap Husî abeno. Destê xo dano sêneyê xo ro, vano:

- Zamayê to kişto, zamayê to.