zazaki.net
24 Teşrîne 2017 Îne
Girdîya Karakteran : 12 Punto 14 Punto 16 Punto 18 Punto
29 Êlule 2009 Sêşeme 09:09

Hîrê Belayê Citêrî

[Mesela]
Hemîd Hozan

Merdimêk hêgayê xo çîneno, genimê (xele) xo keno şimêle. Çend rojî verê tîje de verdeno, dima şimêlanê xo cema keno nano pêser, keno girze û dano gire. Badê cû girzanê xo kom keno ano yew ca keno cele. Badê vîst rojî-mengêk ciwîn virazeno genim ano keno ci, gayanê xo gire dano û dest bi kuwayîşê ciwînî keno. Gayê ey yê dorî zexel o, ge raşt şino ge çep şino, mêrik pa werem beno. Bi tep û repî, hirm û gulmî û zor û bela di rojan de ciwînê xo kuweno keno simer. Na rey, melêwe gêno dorê ciwînî ra şino yeno, ciwînî va dano (erzeno hewa), la çi fayde va (ba, hewa) nîno, rey-rey yeno, la va zî sey gayî zexel o. Ge vakur ra yeno ge zî başur ra. Camêrd merezdarî beno, keno-nêkeno nêqedêneno. Hasilîkelam, ez çi sereyê şima bidejnî, tam hîrê roj û hîrê şewî bi zor û bela ci ra xelesyeno. Êdî ciwîn safî biyo, simer ho kiştêk (het) de û xele zî ho kiştêk de. Mêrik êdî xo ra kewto, hal tede nêmendo. Ruşeno ro, binêk boya (îsrehet) xo dano, cixara xo pêşeno çend helmî anceno; ewnêno yew nişto (aspar) mayêne ho yeno, silameleyk, eleyksilam, melayê dewe yo. Mela vano:

- To rê qewet bo, Homa bereketê xo bierzo ci.

Mêrik vano:

- Homa to ra razî bo, xeyr ameyî silamet, sere û çimanê mi ser, merheba to rê kerem bike, ruşe.

Mêrik qutîya xo ya cixara tûnik (cêb) ra vejeno, cixarêka barîye pêşeno dano melayî, bi adirgeyê xo yê muxtarî ci rê tafîneno û dest keno xeberdayişî, vano:

- Mela, ez to ra nêvana Homayî ra vana, ez ciwînî de merda. A ke mi ga û vayî ra diya tena Homa zano. A ke ameya mi sereyî ser de, nêro vergê koyan ser de. Verg gune yo, nêro her û kutikî ser de. Ê zî gune yê. Malê bênamusî gayê mi yê dorî, gayê zerdî ez werem kerda. Raşt û çep kerdêne nêzanayne ciwîn bikuwo. Malê qebraxî! Eke ti ciwîn nêkuwenî û cite nêkenî ti çi bîyî ga? Ti do bibî manga. La va? Vayî zî mi rê înad kerdêne, malê Homayî! Ti çi geraneke çarnenî? Yan qîble ra bê yan vakur ra! Ez çi sereyê to bidejnî, mi zaf dîya. Heqet ez kewta xeberdayiş, qusûrê mi efû bike, mi girweyê to nêpersa, kerem bike, ez goştarîyê to kena.

Mela vano:

- Homa to ra razî bo, girweyê mi çin o. Ez ameya ke ti malê Homayî bidî mi. Ti zanî zikate des ra yew a.

Gama ke mela qalê zikate keno, sixortaya camêrdî erzena, vano:

- La hewle wela / Hîrê çî mi rê bîy bela / Yew ga, yew va, yew mela / Îlla mela îlla mela!

Na xebere 1641 rey wanîyaya
No nuşte hema şîrove nêbîyo.